ChatGPT шифокорлар топа олмаган ташхисни аниқлади: америкалик аёлнинг ажойиб ҳикояси

^{Фото: The Sun}
АҚШда яшовчи Лорен Бэннон бир неча ой давомида соғлиғидан ташвишланиб юрди. 2024 йил февраль ойидан бошлаб унинг жимжилоқ бармоғи тонгда ва кечқурун қаттиқлашиб, букилишда қийинчилик туғдира бошлади. Лорен мутахассисларга мурожаат қилган, улар эса унга ревматоид артрит ташхисини қўйишган. Лекин бу касаллик учун ўтказилган тест натижалари салбий чиқди.

Бир неча ой ўтиб, Лорен ошқозонида кучли оғриқ ҳис қила бошлади. Бу сафар шифокорлар унинг аҳволини кислотали рефлюкс билан изоҳлашди. Аммо аёл шифокорларнинг айтган ташхисларига ишончсизлик билдира бошлади ва ўзини қийнаётган белгиларни сунъий интеллект — ChatGPT чатботига ёзиб кўрди.

Таъсирли жиҳати шундаки, сунъий интеллект Лоренда қалқонсимон без билан боғлиқ Ҳашимото касаллиги борлигини аниқ ва дарҳол тахмин қилди. Бу аутоиммун хасталик бўлиб, қалқонсимон без яллиғланиши билан характерланади. Лорен бу маълумот билан шифокорга мурожаат қилганида, мутахассис бундай ташхиснинг унда бўлиши мумкинлигини рад этиб, оиласида бу касаллик кузатилмаганини таъкидлади.

Бироқ Лорен ўз фикрида қатъий туриб, шифокорлардан ушбу касаллик бўйича ҳам текширув ўтказишни илтимос қилди. Тест натижалари эса аёлда ҳақиқатан ҳам Ҳашимото касаллиги мавжудлигини тасдиқлади. Кейинги босқичда ўтказилган қалқонсимон безнинг ультратовуш текшируви натижасида Лореннинг бўйнида иккита саратон ўсмаси ҳам аниқланди.

2025 йилнинг январ ойида Лорен қалқонсимон без ва икки лимфа тугунини олиб ташлаш бўйича операция ўтказди. Ҳозирда у ҳамон шифокорлар кузатувида қолмоқда.

Лореннинг таъкидлашича, агар ChatGPT унга бу ташхисни аниқлаб бермаганида, Ҳашимото касаллигининг классик белгиларини намоён этмагани сабабли, шифокорлар саратонни пайқамай қолиши мумкин эди.

«Шифокорим менга омадим чопганини, касаллик эрта босқичда аниқланганини айтди. Агар сунъий интеллектдан фойдаланмаганимда, касаллик тарқалиб кетган бўларди, буни аниқ биламан», – дейди Лорен Бэннон.

Бу ҳолат сунъий интеллектнинг тиббиёт соҳасида қанчалик фойдали восита бўлиши мумкинлигини яна бир бор исботлади. Ҳикоя миллионлаб инсонларни ҳайратга солди ва бу соҳада янги имкониятларни очиши мумкин. «Замин»ни Telegram’да ўқинг!