“Уйқудаги шаҳзода”нинг тақдири 19 йилдан сўнг ўзгарди

Саудия Арабистони қироллик оиласи узоқ йиллардан буён давом этиб келаётган бир фожиали қиссани ёпишга мажбур бўлди: шаҳзода Ал-Волид ибн Холид ибн Талал 35 ёшида вафот этди, деб ёзади thenationalnews.com. У 2005 йилдан бери, яъни шунча йил мобайнида кома ҳолатида ҳаёт кечираётган эди.

Тақдир ҳазилига қарангки, шаҳзода ҳаётининг ярмига яқин қисмини ҳушсиз ҳолда, сунъий нафас олдирувчи аппаратлар ва умидга суянган оила аъзолари бағрида ўтказди. У Лондондаги ҳарбий лицейда таълим олаётган пайтда содир бўлган йўл-транспорт ҳалокати унинг бутун тақдирини ўзгартирди. Жароҳат жуда оғир бўлиб, бош мия жароҳати ва ички қон кетиш оқибатида комага тушган.

Орадан 19 йил ўтди. Шу вақт мобайнида шаҳзоданинг бармоқлари ёки кўзи ҳаракат қилган ҳар қандай ҳаракати яқинларида катта умид уйғотган. Хусусан, 2020 йилда у ҳаракат қилгани ҳақидаги видеолар ижтимоий тармоқларда кенг муҳокама қилинганди. У ҳатто “умид ва сабр-тоқат рамзи” сифатида тилга олина бошланган эди.

Шунингдек, шаҳзода Ал-Волид нафақат инсон сифатида, балки қироллик оиласидаги ўрни билан ҳам эътиборда бўлган. У — шаҳзода Холид ибн Талалнинг фарзанди, машҳур миллиардер Ал-Волид ибн Талалнинг жияни ва Саудиянинг биринчи подшоҳи Абдулазизнинг эвараси эди.

Ажабланарлиси, унинг отаси барча босимларга қарамай, комадаги ўғлининг ҳаётини сунъий нафас ускуналари ёрдамида узайтиришни талаб қилган. Ҳаёт белгиларининг бор-йўққа чиқишига қарамай, у доим фарзанди бир куни ҳушига келишига ишонган.

Бироқ бу умид сўнди. 2025 йил 19 июль куни шаҳзоданинг вафоти расман эълон қилинди. Дафн маросими 20 июль куни бўлиб ўтиши мўлжалланган.

Ижтимоий тармоқларда “#SleepingPrince” ҳештеги остида минглаб одамлар шаҳзоданинг оиласига ҳамдардлик билдирмоқда. Бу ҳам одамларнинг қалбидаги инсоний туйғулар, умид ва бардош қанчалик муҳим эканини яна бир бор эслатди.

Умид қилинадики, Ал-Волиднинг ажиб қиссаси бошқалар учун ибрат ва куч манбаи бўлиб қолади. Тақдир қай шаклда бўлмасин, инсон ҳаёти қадри ҳар доим улуғ. «Замин»ни Telegram’да ўқинг!