Америка Қўшма Штатлари ҳудудига киришни режалаштираётган айрим давлатлар фуқаролари энди виза расмийлаштиришда янги молиявий шартга дуч келишади. Reuters агентлигининг Давлат департаменти маълумотларига таяниб хабар беришича, энди айрим мамлакатлардан келаётган меҳмонлардан 5 мингдан 15 минг АҚШ долларигача миқдорда гаров пули сўралиши мумкин.
Ушбу талаб авваламбор виза олиб, мамлакатда белгиланган муддатдан ортиқ қоладиган сайёҳларнинг олдини олишга қаратилган. Яъни, АҚШ ҳукумати ўз ҳудудига кириб, виза талабларини бузадиган фуқароларга қарши самарали чоралар кўриш мақсадида ушбу синов дастурини жорий қилмоқда.
Тафсилотлар қандай?
Таъкидланишича, янги дастур 2025 йил 20 августдан кучга киради ва тахминан бир йил давомида амал қилади. Бу лойиҳа Америкадаги консуллик органларига муайян юртлардан келаётган номзодлардан гаров пули ундириш ҳуқуқини беради. Агар номзод мамлакат визаси муддатини бузиш эҳтимоли юқори деб баҳоланса, ундан молиявий кафолат сўралиши мумкин.
Бундан ташқари, агар сайёҳлар текширувлар, маълумотлар ёки скрининг жараёнлари тўлиқ таъминланмаган давлатлардан келган бўлса, уларга нисбатан ҳам ушбу талаб қўлланилиши эҳтимоли бор.
Гаров қандай миқдорда талаб қилинади?
Янги тартибга кўра, номзодларга 3 хил гаров миқдори таклиф этилади: 5 минг, 10 минг ёки 15 минг доллар. Аммо маълумотларга кўра, кўп ҳолларда камида 10 минг долларлик гаров сўралиши кутилаяпти. Бу маблағ вақтинча сақланади ва агар саёҳатчи виза талабларига амал қилиб, белгиланган муддатда ватанига қайтса, пул тўлиқ равишда ўз эгасига қайтариб берилади.
Ушбу дастур илгари ҳам бўлганми?
Айтиш жоизки, шундай синов механизми аввал ҳам мавжуд бўлган. 2020 йил ноябр ойида, Трамп маъмуриятининг охирги ойларида шунга ўхшаш тизим амалга оширилган эди. Бироқ пандемия туфайли халқаро саёҳатлар кескин қисқаргани сабабли, дастур тўлиқ ҳаётга татбиқ этилмаган.
Виза йиғими ҳам йўлга қўйилади
Бундан ташқари, АҚШ Конгресси томонидан июль ойида тасдиқланган янги қарорга мувофиқ, ноиммиграция визасига эга бўлган барча талабгорлардан 250 доллар миқдорида махсус йиғим ундирилади. Қизиқарлиси шундаки, ушбу йиғим визани қонунлар асосида тўлиқ адо этган фуқароларга кейинчалик қайтарилиши мумкин. Мазкур йиғим 1 октябрдан бошлаб амалиётга жорий этилади.
Хулоса ўрнида
Америка визасини олишни ният қилаётган фуқаролар учун янги талаблар нафақат моддий жиҳатдан, балки масъулият жиҳатидан ҳам катта аҳамият касб этади. Саёҳат ёки иш юзасидан Америкага бормоқчи бўлганлар бу янгиликка тайёр туришлари ва виза талабларини аввалдан пухта ўрганишлари мақсадга мувофиқ.
«Замин»ни Telegram’да ўқинг!
