Украина президенти Володимир Зеленский Ню-Йорк шаҳрида бўлиб ўтган ёпиқ мулоқотда АҚШ президенти Доналд Трампдан Москвадаги муҳим нишонларни уриши мумкин бўлган Tomahawk қанотли ракеталарини тақдим этишни сўрагани ҳақида Британиянинг The Telegraph нашри маълум қилди.
Газета ёзганидек, Зеленский Оқ уй раҳбарига ушбу юқори технологияли қуроллар Россия президенти Владимир Путинни тинчлик келишуви бўйича музокаралар столига мажбурий равишда ўтқазишда қўшимча восита сифатида хизмат қилиши мумкинлигини таъкидлаган.
Бир неча манбаларнинг маълумот беришича, Зеленскийнинг бу илтимоси БМТ Бош Ассамблеяси доирасида ўтказилган икки давлат раҳбарларининг ёпиқ учрашувида тилга олинган ва америкаликлар томонидан “ижобий” деб баҳоланган.
Учрашувдан кейин Зеленский берган интервюсида президент Трамп унинг илтимосини хайрихоҳлик билан қабул қилганини айтди:
«Мен кеча президент Трампга бизга керак бўлган нарсани айтдим. Бу қурол бизга зарур, лекин бу биз уни дарҳол ишлатамиз дегани эмас. Агар бу қурол бизда бўлса, менимча, Путинни музокаралар столига ўтқазиш учун кучли босим бўлади», — деди Украина етакчиси.
Tomahawk ракеталари 1250 километрдан 2500 километргача масофани босиб ўта олади ва душманнинг чуқур ҳудудларига юқори аниқликда зарба бериш имкониятини беради. Ушбу қурол НАТО арсеналида стратегик аҳамиятга эга ҳисобланади.
Шу пайтгача АҚШ Украинага бундай турдаги ракеталарни беришдан доим бош тортган эди. Зеленскийнинг бу уринишлари муваффақиятли бўладими ёки йўқми, ҳозирча аниқ эмас, дейилади мақолада.
«Замин»ни Telegram’да ўқинг!
