Туркия президенти Ражаб Тоййиб Эрдўған мамлакатда миллати турк бўлган хорижликларни ишга қабул қилиш жараёнларини соддалаштирувчи янги фармонни имзолади. Ҳужжат 10 октябрь куни расман эълон қилинди ва у кўплаб хориждаги турк диаспораси вакиллари учун янги имконият эшигини очди.
Янги тартибга кўра, миллати турк бўлган, аммо бошқа давлат фуқаролигига эга шахслар Туркияда мураккаб бюрократик жараёнларсиз ишлаш ҳуқуқига эга бўлади. Улар давлат ва хусусий секторда тадбиркорлик ёки касбий фаолият билан шуғулланиши мумкин. Бироқ ҳарбий хизмат ва хавфсизлик идораларида фаолият юритиш улар учун тақиқланган бўлиб қолади.
Фармонда таъкидланишича, бу шахслар Туркия фуқаролари каби касбий уюшмаларда рўйхатдан ўтиши шарт бўлади. Аммо улардан Туркия фуқаролигини талаб қилиш бекор қилинган — энди яшаш ва ишлаш учун фуқаролик олиш мажбурияти йўқ.
Шу билан бирга, янги қонун уларга сиёсий ҳуқуқлар, яъни сайловларда иштирок этиш ёки номзод бўлиш имкониятини тақдим этмайди.
Мутасаддилар таъкидлашича, бу қарорнинг асосий мақсади — турк илдизларига эга бўлган мутахассисларни мамлакат иқтисодиётига жалб этиш ва Туркия билан улар ўртасидаги маънавий ҳамкорликни мустаҳкамлашдир.
Экспертлар фикрича, мазкур фармон хориждаги турк диаспораси учун янги имконият яратиб, Туркия меҳнат бозорида малакали кадрлар етишмаслигини қисман бартараф этишга хизмат қилади.
Шундай қилиб, янги ташаббус Туркиянинг глобал майдонда турк миллатдошларига нисбатан очиқ сиёсат юритишини ва уларни мамлакат ривожига жалб этиш ниятини яққол кўрсатмоқда.
“Zamin”ни Telegram'да ўқинг!
