Россиянинг Амур вилоятида йирик йўл-транспорт ҳодисаси қайд этилди. Свободний шаҳри яқинида ишчиларни олиб кетаётган автобус енгил автомобиль билан тўқнашиб, ағдарилиб кетди. Ҳодиса оқибатида бир киши ҳалок бўлди, бир неча нафар фуқаро оғир жароҳат олди. Бу ҳақда ТАСС ахборот агентлиги хабар берди.
Маълумотларга кўра, 16 октябрь куни кечқурун Амур газ-кимё мажмуаси қурилишида меҳнат қилаётган ишчиларни ташувчи автобус Toyota Probox русумли енгил машина билан тўқнашган. Автобус Туркиянинг Yamata пудратчи компаниясига тегишли бўлган ва у ерда Туркия, Ўзбекистон ҳамда Тожикистон фуқаролари ишлаётган эди.
Тўқнашув шиддати жуда кучли бўлгани сабаб автобус йўл четига чиқиб кетган ва ағдарилиб тушган. Ҳодиса жойига тез ёрдам ва қутқарув хизматлари етиб келган.
Расмий маълумотга кўра, жами 49 киши жароҳатланган. Улардан бири воқеа жойида вафот этган, 14 нафар фуқаро шифохонага ётқизилган, бир киши оғир аҳволда реанимация бўлимига жойлаштирилган.
Россия Федерацияси Тергов қўмитаси мазкур ҳодиса бўйича текширув бошлади. Тергов органлари жиноят ишини Жиноят кодексининг 238-1-моддаси — “Хавфсизлик талабларига жавоб бермайдиган ишлар ёки хизматлар кўрсатиш” банди бўйича очди.
Ҳозирда воқеа сабаблари ўрганилмоқда. Дастлабки маълумотларга кўра, енгил автомобиль ҳайдовчиси йўл қоидаларини бузган бўлиши мумкин. Автобус ва енгил машина техник экспертизадан ўтказилади.
Туркиянинг Yamata компанияси ҳодисадан кейин махсус комиссия ташкил этганини ва жароҳатланган ишчиларга тиббий ёрдам кўрсатилаётганини маълум қилди.
Маҳаллий ОАВнинг ёзишича, автобусдаги ишчилар асосан Амур газ-кимё мажмуасининг қурилиш майдонида меҳнат қилаётган хорижлик мутахассислар бўлган. Улар ҳар куни иш жойига ва қайтиб келиши учун компания томонидан ташиш хизмати билан таъминланади.
Фожиа ҳозир Россия жамоатчилигида кенг муҳокама қилинмоқда. Тергов натижалари ва автобус ҳайдовчисининг ҳаракатлари юзасидан яқин кунларда қўшимча маълумот берилиши кутилмоқда.
Маҳаллий ҳокимият ва консулликлар жабрланувчиларга ёрдам кўрсатиш учун шифохоналар билан алоқада эканлиги билдирилди.
“Zamin”ни Telegram'да ўқинг!
