Японияда даҳшатли ЙТҲ: 57 машина занжирли тўқнашувга учради
Япониянинг Гунма префектурасидаги Кейнцу тезюрар автомагистралида 57 та транспорт воситаси занжирли тўқнашувга учради. Жума куни тахминан соат 19:30 да юз берган ҳодисада 10 дан ортиқ автомобил ёниб кетди, ёнғинни ўчиришга қарийб 7,5 соат вақт кетди. Икки киши, жумладан 77 ёшли аёл ҳалок бўлди, 26 киши жароҳатланди ва улардан беш нафари оғир аҳволда шифохонага ётқизилди.
Японияда йирик йўл-транспорт ҳодисаси содир бўлиб, ўнлаб автомобиллар бир вақтнинг ўзида тўқнашди. Фожеа оқибатида бир неча машина ёнғинга ўралиб, қутқарув ишлари соатлаб давом этган.
Маълум қилинишича, ҳодиса Гунма префектураси ҳудудидан ўтувчи Канецу тезюрар автомагистралида жума куни тахминан соат 19:30 ларда рўй берган. Дастлабки маълумотларга кўра, икки юк машинасининг ўзаро тўқнашуви занжирли аварияга сабаб бўлиб, оқибатда 57 та транспорт воситаси йўлнинг турли қисмларида тўхтаб қолган.
Кучли тўқнашувлар натижасида 10 дан ортиқ автомобил ёниб кетган. Ёнғинни тўлиқ бартараф этиш учун ўт ўчирувчи хизматларига қарийб 7,5 соат вақт талаб этилган. Қутқарувчилар юқори ҳарорат ва портлаш хавфи шароитида иш олиб борган.
Полиция маълумотларига кўра, ҳодиса оқибатида икки киши ҳалок бўлган. Уларнинг жасадлари ёниб кетган транспорт воситаларидан топилган. Вафот этганлардан бири 77 ёшли аёл экани тасдиқланди. Шунингдек, 26 нафар инсон турли даражада тан жароҳати олган бўлиб, уларнинг беш нафари оғир аҳволда шифохонага ётқизилган.
Тергов органлари фожеанинг асосий сабаби сифатида ноқулай об-ҳаво шароитини кўрсатмоқда. Хусусан, кучли қор ёғиши ва йўл қопламасининг ўта сирпанчиқ ҳолатга келиб қолгани ҳайдовчилар учун хавфли вазият юзага келтирган.
Ҳозирда Канецу тезюрар йўли Юзава ва Цукиёно чорраҳалари орасида ҳар икки йўналишда ҳам ёпиқ ҳолатда қолмоқда. Эвакуаторлар шикастланган транспорт воситаларини олиб чиқишни бошлаган бўлса-да, йўлни тўлиқ тозалаш ва хавфсиз ҳолатга келтириш учун яна маълум вақт талаб этилиши айтилмоқда.
Изоҳлар 0
…