Украина президенти Владимир Зеленский ўз жамоасига Владимир Путин билан тўғридан-тўғри учрашувни тайёрлаш вазифасини бергани айтилмоқда. Axios маълум қилишича, Зеленский “муаммоларни ечишнинг энг тўғри йўли — Путин билан шахсан гаплашиш” деб ҳисоблайди ва лидерлар даражасидаги учрашувни Женевада ташкил қилишни топширган.
Шу фонда Кремль позицияси ҳам кескин: Москва томони “агар Зеленский учрашув истаса, у ҳолда Москвага келиши керак” деган мазмунда сигнал берган. Бу ҳақда Кремль ёрдамчиси Юрий Ушаков 28 январда баёнот бергани хабар қилинган. Зеленский эса Россия пойтахтига бориш вариантини қабул қилмагани айтилмоқда.
Музокаралар мазмунида энг оғир “тугун” — ҳудуд ва қўшинлар масаласи. Axios интервьюсида Зеленский Украина Донбассдан ўз кучларини чиқаришни фақат Россия ҳам қўшинларини чегара/фронт чизиғи бўйлаб орқага олиб кетган тақдирдагина муҳокама қилишини билдирган. У, шунингдек, ҳудудлар статуси бўйича қарорни референдум орқали ҳал қилиш эҳтимоли борлигини ҳам тан олган ва фронт линиясини мустаҳкамлаб, ҳозирги ҳолатни “музлатиш” варианти украин жамиятида муайян шароитда қўллаб-қувватланиши мумкинлигини айтган.
Қисқаси, саҳнада икки хил таклиф турибди: Киев “Женевада саммит” дейди, Москва эса “келсанг — Москва” деяпти. Бу ерда энг ҳал қилувчи нарса — формат эмас, мазмун: қўшинлар, хавфсизлик кафолатлари ва ҳудудий масалалар бўйича ким қанча “реал қадам” ташлайди.
Яқин келажак учун прогноз оддий: агар томонлар учрашув жойи устида тортишаверса, вақт кетади ва фронтдаги реаллик сиёсатни “қувиб етади”. Агар эса учрашув бўлиб, камида техник келишувлар (масалан, ўт очишни тўхтатиш/кузатув/алмашинув) илгариласа — кейин катта сиёсий пакетга йўл очилиши мумкин. Ҳа, оғир. Лекин айнан шундай пайтда “узоққа борадиган” қарорлар қабул қилинади.
“Zamin”ни Telegram'да ўқинг!
