Украина президенти Владимир Зеленский Европа Иттифоқи томонидан ажратилиши режалаштирилган 90 миллиард евролик молиявий ёрдам пакетининг блокланаётганидан норозилигини билдирди. Унинг сўзларига кўра, иттифоқ таркибидаги биргина давлатнинг қаршилиги бутун мамлакат иқтисодиёти учун жиддий хавф туғдирмоқда. Зеленский бу масалани ҳал қилишда кескин оҳангдан фойдаланиб, ёрдамни тўсаётган шахс билан Украина Қуролли кучлари ўз услубида гаплашиб олиши мумкинлигини таъкидлади.
Ҳозирги вақтда Украина учун ушбу маблағлар ҳаётий аҳамиятга эга ва уларнинг ўрнини босадиган бошқа муқобил манбалар мавжуд эмас. Мутахассисларнинг фикрича, Венгриянинг бу борадаги позицияси нафақат сиёсий қарама-қаршиликлар, балки энергетик манфаатлар билан ҳам боғлиқ. Хусусан, Будапешт "Дружба" нефть қувури орқали етказиб бериладиган хомашё таъминотини сақлаб қолишга интилмоқда.
Эслатиб ўтамиз, Венгрия ҳукумати нафақат молиявий ёрдам пакетига, балки Россияга қарши тайёрланаётган 20-санкциялар пакетига ҳам қарши чиқиб келмоқда. Европа Иттифоқи доирасидаги бу каби келишмовчиликлар Киевнинг халқаро ҳамкорлардан кутаётган ёрдамларини кечиктирмоқда. Украина раҳбарияти эса Европа давлатларини бирдамликка чақириб, молиявий кўмак уруш шароитида мамлакат барқарорлигини сақлаш учун ягона йўл эканини қайд этмоқда.
“Zamin”ни Telegram'да ўқинг!
