АҚШда фарзандларини мактабга кузатиб қўйгач бедарак йўқолган аёл орадан 11 йил ўтиб тирик ҳолда топилди. Бу ҳақда Mirror нашри маълум қилди.
Маълум қилинишича, 2002 йилнинг февраль ойида Пенсилванияда яшовчи Бренда Ҳейст болаларини мактабга олиб борганидан кейин изсиз ғойиб бўлган.
Аниқланишича, ўша вақтда 42 ёшли аёл оғир ажрашув жараёнини бошдан кечираётган бўлиб, молиявий қийинчиликларга бардош бера олмаган.
Бренданинг турмуш ўртоғи хотинини ўлдирганликда гумон остига олинган, аммо етарли далил топилмагани ва у ёлғон детектори синовидан муваффақиятли ўтгани сабабли тергов иши ёпилган. Кейинроқ маълум бўлишича, Бренда ғойиб бўлган куни боғда нотаниш одамлар билан учрашган ва улар унга Флоридага бирга кетишни таклиф қилган. Ҳейст бу таклифга рози бўлиб, бошқа исм билан ҳаёт кечира бошлаган. Кейинги йиллар давомида у яширин турмуш тарзини олиб бориб, нақд пул эвазига меҳнат қилган ҳамда ўзидан ҳеч қандай из қолдирмасликка уринган.
Аёл ўзини бева аёл сифатида таништирган ва ҳеч қачон фарзандли бўлмаганини айтган. 2013 йилда эса у бир нечта жиноятларда, жумладан ҳайдовчилик гувоҳномасини ўғирлашда айбланиб қўлга олинган. Шахсига ойдинлик киритиш жараёнида унинг кўп йиллар аввал бедарак йўқолган Бренда Ҳейст экани маълум бўлган.
Ўша вақтда Бренда оиласини ташлаб кетганидан уялиши ҳақида айтган, бироқ ўша пайтда айнан шу қарорни энг тўғри йўл деб ҳисоблаганини таъкидлаган. Озодликка чиққанидан кейин у Техас штатига, онасининг олдига кўчиб ўтган, аммо фарзандлари билан муносабатларини қайта тиклай олмаган.
“Zamin”ни Telegram'да ўқинг!
