Тўп зарбаси фожиага айланди: 14 ёшли футболчи вафот этди
Аргентинада ўтказилган ҳаваскорлар футбол учрашуви вақтида 14 ёшли ўсмир кўкрагига тўп текканидан сўнг вафот этди. Ўйин давомида кучли зарба олган футболчи майдонга йиқилиб, унда талваса аломатлари кузатилган ва шифохонага олиб кетилаётганда юраги тўхтаган. Мутахассислар ушбу фожиали ҳолатга кўкрак қафасининг чап томонига тушган зарба оқибатида юзага келадиган "коммотио кордис" ҳодисаси сабаб бўлган бўлиши мумкинлигини тахмин қилмоқда.
Фожиали ҳодиса Аргентинада бўлиб ўтган ҳаваскорлар футбол учрашуви вақтида юз берди.
Ўйин давомида тўп ўсмирнинг кўкрагига қаттиқ зарб билан теккан. Шу заҳоти у қичқириб юбориб, майдонга йиқилган. Бир неча сониядан сўнг ўрнидан турган бўлса-да, орадан кўп ўтмай яна майсазорга қулаб тушган. Шундан кейин унда талваса (тутқаноқ) аломатлари кузатилган.
Воқеа жойига дарҳол шифокорлар етиб келиб, ёш футболчини шошилинч тарзда шифохонага олиб йўл олишган. Афсуски, йўл давомида унинг юраги тўхтаб қолган. Шифокорлар жонлантириш чораларини кўрган бўлсалар-да, ўсмирнинг ҳаётини сақлаб қолишнинг имкони бўлмаган.
Мутахассислар тахминига кўра, бу ҳолатга “юрак чайқалиши” — тиббиётда "commotio cordis" деб аталувчи кам учрайдиган, бироқ ўта хавфли ҳодиса сабаб бўлган бўлиши мумкин. Бунда кўкрак қафасининг чап томонига тушган кучли зарба юрак ритмини издан чиқариб, кутилмаган ўлимга олиб келади.
Изоҳлар 0
…