Париждаги дунёга машҳур Нотр-Дам-де-Пари соборига ўт кетди (видео)

Париж рамзларидан бири бўлган Муқаддас она ибодатхонаси – Нотр-Дам-де-Парида (Париж Биби Марям собори) кучли ёнғин чиқди.

Ҳодисанинг твиттерда жойланган кўплаб видеоларида ибодатхонадан чиқаётган қуюқ қора тутун ва оловни кўриш мумкин.

Notre dame de #Paris, panache du fumée jaune, le feu semble dévorer l’église toute entière pic.twitter.com/4zRcAr86Ng
— Chrystèle Bazin (@chrystelebazin) April 15, 2019

Воқеа жойига кўплаб ўт ўчириш ва фавқулодда хизматлар машиналари етиб келган. Собор ичидаги одамларнинг барчаси эвакуация қилинган.

Ёнғин оқибатида соборнинг XIX асрда қурилган шпили (учи) ва том қисми, шунингдек соатлар ўрнатилган қисми қулаб тушган.

Собор матбуот хизмати бошлиғи Андре Фино XII асрда қурилган Нотр-Дам-де-Пари ибодатхонаси бутунлай ёниб вайрон бўлганини тасдиқлаган.

Ёнғин қурилиш ишлари билан боғланган бўлиши мумкин. Айни вақтда черковнинг бир қисми ҳавозалар билан ўралган бўлиб, у ерда реставрация ишлари кетаётганди. Ҳодиса сабаблари аниқлаштирилмоқда.

Effondrement de la flèche de #NotreDame. Pas de mots. Quelle tristesse. Terrible. pic.twitter.com/xw9zh5SwED
— Thomas Portes ✊ (@Portes_Thomas) April 15, 2019

Франция президенти Эммануэль Макрон ўз рафиқаси билан ҳудудга ташриф буюрган. У «сариқ жилетлар» ҳаракати муносабати билан душанба куни кечқурунга мўлжалланган миллатга мурожаатномасини қолдирган.

Париж Биби Марям собори XII-XIV асрларда барпо этилганди. Бу Европадаги энг машҳур туристик обидалардан бири ҳисобланарди. Собор ҳар йили миллионлаб сайёҳларни ўзига жалб этиб келарди.