Голландиянинг Амстердам университети олимлари фарзандлар ва ота-оналар ўртасидаги яқинликни ошириш бўйича қизиқарли тадқиқот ўтказди. Улар махсус тузилган саволлар орқали қисқа суҳбатлар болаларнинг ўзларини кўпроқ севилган ва қадрланган ҳис этишларига ёрдам беришини аниқлади. Мутахассисларнинг фикрича, бу усул оилавий муҳитни мустаҳкамлашда муҳим аҳамиятга эга.
Тадқиқотда 8–13 ёшдаги болалар ва уларнинг ота-оналари иштирок этди. Ота-оналардан фарзандларига “Қаерга саёҳат қилишни хоҳлайсан?”, “Ҳаётингдаги энг ғалати воқеа?” каби саволлар бериш сўралди. Суҳбат атиги тўққиз дақиқа давом этди, бироқ натижада болалар ўзларини олдингига нисбатан кўпроқ меҳр ва эътибор остида эканини ҳис қилди.
Олимлар бу ҳолатни “очиқлик орқали яқинлик” деб атайди. Яъни инсон ўз фикр ва ҳис-туйғуларини бошқалар билан бўлишганида, улар ўртасида ишонч ва самимият кучаяди. Шунинг учун ота-оналарнинг фарзандлари билан шундай саволлар асосида суҳбат қуриши болада ўзини тингланаётган ва қадрланаётганини ҳис эттиради.
Мутахассислар кузатув жараёнида кўплаб оилалар илгари бу каби чуқур мавзулар ҳақида суҳбатлашмаганини аниқлади. Одатда ота-оналар фарзандлар билан фақат ўқиш, ўйин ёки кундалик мавзуларни муҳокама қилади. Аммо шундай самимий суҳбатлар орқали улар болаларнинг ички дунёсини яхшироқ тушуниши мумкин.
