Инсон танасининг табиий ҳиди ҳар бир кишининг ўзига хос белгисидир. Олимлар фикрича, бу ҳид фақат гигиена ёки генларга эмас, балки истеъмол қилинадиган овқатларга ҳам боғлиқ. Сўнгги тадқиқотлар айрим маҳсулотлар тананинг ҳидини ёқимлироқ қилиши ва ҳатто инсонни бошқаларга жозибадорроқ кўрсатишини кўрсатган.
Масалан, сабзавот ва меваларга бой овқатланадиган инсонларнинг танасидан ёқимли, ширин ва гулли ҳид келиши аниқланган. Аксинча, углеводга бой ёки гўштни кўп истеъмол қиладиган инсонларнинг ҳиди унчалик ёқимли бўлмаган. Шунга қарамай, саримсоқ истеъмол қилган эркакларнинг тер ҳиди тадқиқотларда ёқимли деб топилган. Олимлар бу ҳолатни саримсоқнинг соғлиқни яхшиловчи табиий моддаларига боғлашади.
Спиртли ичимлик ва кофе эса тана ҳидини ёмонлаштириши мумкин. Спирт парчаланганда кучли ҳидли модда ажралади, бу эса оғиздан нохуш ҳид келишига сабаб бўлади. Кофе эса тер ажралишини кучайтириб, бактериялар кўпайишига имкон яратади. Шу боис, бу маҳсулотларни меъёрида истеъмол қилиш тавсия этилади.
Мутахассислар таъкидлайдики, ёқимли ҳидли бўлиш учун атир ёки парфюмнинг ўзи етарли эмас. Тананинг табиий ҳиди аввало тўғри овқатланиш билан боғлиқ. Соғлом, сабзавот ва меваларга бой рацион нафақат соғлиқни мустаҳкамлайди, балки инсонни бошқаларга янада жозибадор қилади.
