Ветнам Молия вазирлиги кичик ва ўрта бизнес субъектларига (КОБ) банк кредитлари учун рақамли активлар, виртуал активлар ва интеллектуал мулкдан гаров сифатида фойдаланишга рухсат беришни таклиф қилди. Ушбу ташаббус КОБни қўллаб-қувватлаш тўғрисидаги қонуннинг янгиланган лойиҳасига киритилган бўлиб, айни пайтда жамоатчилик муҳокамасига қўйилган. Бу ҳақда Cointelegraph.com хабар беради.
Янги қонун лойиҳасига кўра, корхоналар келажакда шаклланадиган активлар, мулкий ҳуқуқлар, номоддий активлар ҳамда рақамли ёки виртуал активлар орқали кредит олишлари мумкин бўлади. Ҳозирда Ветнамдаги корхоналарнинг 98 фоизидан ортиғини кичик бизнес ташкил этса-да, уларнинг иқтисодиётдаги умумий банк кредитларидаги улуши атиги 20 фоизни ташкил этмоқда.
Молия вазирлиги ушбу номутаносибликни тегишли гаров мулкининг йўқлиги, молиявий шаффофликнинг пастлиги ва кичик капитал базаси билан изоҳламоқда. Кўплаб стартаплар ва технологик компаниялар қимматли дастурий таъминот ёки патентларга эга бўлса-да, уларда гаровга қўйиш учун ер ёки жисмоний активлар мавжуд эмас.
Қонун лойиҳаси, шунингдек, кредит ташкилотларини фақат қатъий активларга таянмасдан, балки кредит рейтинглари, бизнес-режалар ва пул оқимларига асосланган ҳолда кредит беришни кенгайтиришга ундайди. Бундан ташқари, яшил иқтисодиёт ва энергия тежовчи лойиҳалар учун имтиёзли молиялаштириш ва фоиз ставкаларини қўллаб-қувватлаш чоралари ҳам кўзда тутилган.
Ветнам дунёдаги энг фаол крипто бозорларидан бирига айланган бўлиб, Чаиналйсис маълумотларига кўра, глобал крипто қабул қилиш индексида тўртинчи ўринни эгаллаб турибди. Молия вазири ўринбосари Нгуен Дук Чи сўзларига кўра, мамлакатда биринчи тартибга солинадиган крипто бозори 2026-йилнинг учинчи чорагида ишга тушиши кутилмоқда.
“Zamin”ни Telegram'да ўқинг!
