1 июль куни ижтимоий тармоқларда тарқалган “Ўрикзор” қурилиш бозори ёпилиши ҳақидаги хабарлар кўпчиликни ташвишга солди. Кўпчилик ушбу ҳолатни электр таъминотидаги муаммолар билан боғлаган бўлса-да, мутасаддилар томонидан берилган расмий маълумотлар масаланинг асл моҳиятини очиб берди.
Маълум бўлишича, “Ўрикзор Строй Город” бозорида ўтказилган текширувлар давомида савдо павилонларида ёнғин хавфсизлигига оид қатор қоидабузарликлар аниқланган. Жумладан, электр симлари нотўғри ўтказилгани, изоляция даражаси талабга жавоб бермаслиги ва хавфли нуқталарда юкламалар меъёрдан ошгани қайд этилган. Бу эса ёнғин хавфи юқори бўлган вазиятни келтириб чиқарган.
Тошкент шаҳри Фавқулодда вазиятлар бошқармаси ҳамда “Ҳудудий электр тармоқлари” АЖ вакиллари томонидан берилган ахборотга кўра, мазкур қоидабузарликлар туфайли бозорни вақтинча ёпиш тўғрисида қарор қабул қилинган. Бу қарор Тошкент туманлараро хўжалик суди томонидан қонуний равишда чиқарилган.
Масъул идоралар таъкидлашича, бозордаги электр таъминотида ҳеч қандай авария кузатилмаган. Яъни, электр энергияси барқарор таъминлаб келинмоқда. Тармоқдаги узилиш ҳақида тарқалган маълумотлар нотўғри бўлиб чиқди. Айрим ижтимоий тармоқ фойдаланувчилари ёки норози тадбиркорлар томонидан тарқатилган бундай хабарлар, аслида, бозор маъмурияти билан юзага келган ички келишмовчиликларга боғлиқ бўлиши мумкин.
Мутахассисларнинг фикрича, бундай бузилишлар ўз вақтида бартараф этилмаса, нафақат моддий, балки инсон ҳаёти учун ҳам катта хавф туғдиради. Шу боис, мутахассислар томонидан берилган огоҳлантиришларга жиддий муносабатда бўлиш лозим.
Бозор фаолиятини тиклаш учун масъул ташкилотлар томонидан аниқланган камчиликлар қисқа муддат ичида бартараф этилиши лозим. Шундагина савдо мажмуаси яна ўз ишини давом эттириши мумкин. Тадбиркорлар ва харидорлар учун яратилган қулайликларни сақлаб қолиш мақсадида, бугунданоқ хавфсизлик талабларига риоя қилиш ва тегишли таъмирлаш ишларини амалга ошириш долзарб вазифага айланди.
Бозор маъмурияти ушбу камчиликлар бўйича ўз фаолиятини қайта кўриб чиқиши ва савдо нуқталарини янада хавфсиз ва қулай қилиш чораларини кўриши зарур. Ҳар қандай йирик савдо ҳудудида биринчи навбатда мижозлар ва ходимлар хавфсизлиги таъминланиши керак.
Шу билан бирга, “Ўрикзор” бозоридаги вақтинча танаффусни фақатгина муваққат чора сифатида қабул қилиш керак. Бу кенг кўламли қайта тузилиш ва хавфсизлик тизимини такомиллаштиришга йўналтирилган ишларнинг бир қисми бўлиб, келгусида бозорнинг янада яхши ва самарали фаолият кўрсатиши учун замин яратиши мумкин.
Тегишли органлар томонидан бозордаги вазият юзасидан мунтазам мониторинг олиб борилади. Камчиликлар тўлиқ бартараф этилгандан сўнг, бозор ўз эшикларини харидор ва тадбиркорлар учун яна очади.
«Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
