Келинини ўпишга уринган қайнота беш кунга қамалди

Сирдарё вилоятида ахлоққа зид, жамиятда қабул қилиб бўлмайдиган ҳолат қайд этилди. Турмуш ўртоғидан ажрашган бўлса-да, келини билан бир хонадонда яшашда давом этган 62 ёшли эркак унга нисбатан беҳурмат, одобсиз ва тажовузкор ҳаракатлар содир этгани учун суд олдида жавоб берди.

Мазкур ҳолат Жиноят ишлари бўйича Сардобин тумани судида кўриб чиқилди. Судда эркак келинини бир неча марта қучоқлагани, ўпгани ва уни безовта қилгани аниқланди. Энг ҳайратланарлиси — эркак бу ҳаракатларини тилла тақинчоқлар ваъдаси билан оқлашга уриниб, келинини моддий совғалар орқали “ёздириш”га уринганини тан олди.

Қайнота судда шундай деган: у келинини “упиш учун” унга тилла тақинчоқ олиб беришни ваъда қилган. Жабрланувчи аёл эса судда бу воқеалар бир неча марта такрорланганини, эркакнинг беҳурматликлари доимий тус олганини айтди. У қайнотасининг жазоланишини, ўзини тинч қолдиришини сўради.

Суд жараёнида эркак ўзини оқлашга уриниб, бу уй ўзи ва ўғлига тегишли эканини, келини эса ҳали расмий рўйхатдан ўтмаганини таъкидлади. Аммо суд бу ҳолатни эътиборга олмаган ҳолда, фақат унинг ҳаракатларини ҳуқуқий нуқтаи назардан баҳолади.

Эркак ўз қилмишини тан олди, узр сўради ва бундай ҳолатлар яна такрорланмаслигини айтди. Аммо унинг қилмиши Ўзбекистон Республикаси Жиноят кодексининг 41-1-моддаси — жинсий зўравонлик элементларини ўз ичига олган безорилик — сифатида баҳоланди.

Жиноят ишлари бўйича Сардобин тумани суди томонидан чиқарилган ҳукмга кўра, 62 ёшли эркак беш суткага маъмурий қамоқ жазосига ҳукм қилинди. Суд ҳукми ижтимоий тармоқларда ҳам кенг муҳокамага сабаб бўлди. Кўплаб фойдаланувчилар эркакнинг бу ҳаракатини нафрат ва ғазаб билан қарши олди.

Бу каби ҳолатлар жамиятда хотин-қизларнинг дахлсизлиги ва шахсий ҳурматини ҳимоя қилиш заруратини янада кучайтирмоқда. Ҳатто қариндошлик муносабатлари ҳам аёлни ўз хоҳишига зид ҳаракатлардан ҳимоя қила олмас экан, демак, қонун бутун кучини кўрсатиши шарт.

Мутахассислар таъкидламоқда: ҳар қандай шахсий муносабат, ҳатто оила доирасидаги муаммолар ҳам ахлоқий ва ҳуқуқий чегаралардан чиқмаслиги лозим. Айниқса, ота-бола муносабатлари, қайнота-келин муносабати жамиятда махсус одоб ва меъёрлар асосида тартибга солинади. Ушбу ҳолат бу меъёрлар қўпол равишда бузилганини кўрсатади.

Бундай ҳолатларга нисбатан жамиятнинг муносабати қатъий ва кескин бўлиши шарт. Агар ҳар бир аёл ўзини ҳимоя қилса, ҳар бир жамият эса бундай хатти-ҳаракатларга бефарқ қолмаса, биз бундан ҳам соғломроқ муҳитни яратишимиз мумкин. «Замин»ни Telegram’да ўқинг!