Андижон вилоятида аёлни шантаж қилиш орқали пул талаб қилган эркак қўлга олинди. Бу ҳақда вилоят ИИБ матбуот хизмати хабар берди.
Маълумотларга кўра, Шаҳрихон туманида яшовчи эркак ўша туманда истиқомат қилувчи аёл билан ишқий муносабатда бўлган. Бир муддатдан сўнг у аёлдан муайян миқдорда пул талаб қилиб, акс ҳолда у билан ёзишган хабарлар, фото ва видеоларни ижтимоий тармоқларда тарқатиш билан таҳдид қилган.
Ҳуқуқни муҳофаза қилувчи органлар томонидан ташкил этилган тезкор тадбирда эркак талаб этган пулни олган вақтда қўлга олинган. Унинг қўлидан ашёвий далиллар — пул ва телефон ускунаси олинган.
Тергов маълумотларига кўра, у товламачилик орқали аёлни шармандалик билан қўрқитиб, мулкий манфаат олишни кўзлаган. Шу асосда Шаҳрихон тумани ИИБ ҳузурида унга нисбатан Ўзбекистон Республикаси Жиноят кодексининг 165-моддаси 1-қисми (товламачилик) бўйича жиноят иши қўзғатилди.
Ҳозирда айбланувчига нисбатан тергов ҳаракатлари олиб борилмоқда. Ҳуқуқни муҳофаза қилувчи идоралар фуқароларни шахсий ҳаёт билан боғлиқ маълумотларни ишончсиз шахсларга юбормаслик ва бундай ҳолатлар юз берганда дарҳол ҳуқуқни муҳофаза органларига мурожаат қилишга чақирди.
Шу билан бирга, мутахассислар таъкидламоқда — шантаж ва товламачилик нафақат жиноят, балки шахсий дахлсизликни қўпол равишда бузиш ҳисобланади.
“Zamin”ни Telegram'да ўқинг!
