Самарқанд шаҳрида Cobalt ҳайдовчисининг уйқуси йўл-транспорт ҳодисасига сабаб бўлди, деб хабар берди вилоят ИИББ ЙҲХБ.
Маълумотларга кўра, 2 ноябрь куни Афросиёб маҳалласидаги Шоҳизинда кўчасида ҳаракатланаётган Cobalt ҳайдовчиси рулда ухлаб қолган. Натижада у машинани бошқарувини йўқотиб, йўл четига ўрнатилган темир тўсиққа урилган.
Зарба оқибатида автомобиль қарама-қарши йўлга чиқиб кетган ва ҳаракатланиб келаётган автобус билан тўқнашган.
Ҳодиса натижасида ҳайдовчи тан жароҳати олиб, шифохонага ётқизилган. Автобусда йўловчилар бўлмагани боис бошқа жабрланувчилар йўқ. Ҳар икки транспорт воситасига моддий зарар етган.
Ҳозирда мазкур ҳолат бўйича дастлабки суриштирув ишлари амалга оширилмоқда. Мутахассислар ҳайдовчиларни чарчоқ ҳолда ёки уйқусиз ҳолда рулига ўтирмасликка чақирмоқда.
Меҳмон гуруҳидаги фойдаланувчилар ушбу мақолага изоҳ қолдира олмайди.
