Сўнгги кунларда ижтимоий тармоқларда сиёсий муҳокамалар яна кескин тус олди. Фойдаланувчиларнинг бир қисми жамоат фаоли Ҳамид Содиқни ҳимоя қилаётган бўлса, иккинчи қисми блогер Аброр Мухтор Алий тарафини олмоқда, деб хабар берди mahalliy манбалар.
Масала Ҳамид Содиқка нисбатан таҳдидлар бўлгани ҳақидаги иддаолардан кейин янада қизий бошлади. Айни вақтда 30 нафар журналист, адвокат, олим ва фаол Аброр Мухтор Алий устидан судга шикоят киритгани маълум қилинди.
Собиқ депутат Расул Кушербаев ҳам бу вазиятга муносабат билдириб, сўз ва фикр эркинлиги давлат томонидан ҳимоя қилиниши лозимлигини таъкидлади. Унинг фикрича, диний асосда кимнидир “оммавий сазойи қилиш” Ўзбекистон Конституциясида йўл қўйилмайди.
«Аброр Мухтор Алийнинг айрим чиқишларида давлатнинг дунёвийлик тамойилига қарши чақириқлар бор, бу эса инсонларнинг конституциявий ҳуқуқларига таҳдид сифатида баҳоланиши мумкин», — деб ёзди Кушербаев.
Инсон ҳуқуқлари фаоли Абдураҳмон Ташанов ҳам мазкур ҳолатга ҳуқуқий баҳо бериш зарурлигини билдирди.
Ҳозирда жамоатчилик Мухтор Алийнинг баёнотларига расмий органлар томонидан ҳуқуқий муносабат билдирилишини кутмоқда.
“Zamin”ни Telegram'да ўқинг!
