Фото: Видеодан кадр
Тошкент шаҳридаги Magic Safari боғида ноодатий ва бироз хавотирли ҳолат юз берди. Қозоғистондан ташриф буюрган аёл кичик қизини мазкур боғдаги жирафалар жойлашган махсус ҳудудга олиб кирган.
Гувоҳларнинг сўзларига кўра, бир пайт қизалоқ хавфсизлик учун ўрнатилган панжара устига чиқиб олган. Шу дақиқада ҳудудда бўлган жирафалардан бири болага яқинлашиб, уни боши билан енгил итариб юборган. Натижада қиз тахминан икки метр баландликдан ерга йиқилган.
Воқеа тезда атрофдагилар эътиборини тортган ва ходимлар зудлик билан вазиятга аралашган. Болага бирламчи тиббий ёрдам кўрсатилган ва онанинг маълумотига кўра, қизда жиддий жароҳатлар аниқланмаган.
Кейинчалик боланинг онаси ушбу ҳолат юзасидан боғ маъмуриятини айблаб, “жирафалар одамлар учун хавф туғдиради” мазмунида баёнот берган. Бироқ мутахассислар одатда ҳайвонлар билан яқинлашув қоидаларига қатъий амал қилиш зарурлигини, айниқса болалар назоратсиз қолмаслиги кераклигини таъкидлайди.
Мазкур воқеа ижтимоий тармоқларда ҳам кенг муҳокамаларга сабаб бўлиб, ҳайвонот боғларида хавфсизлик чораларини янада кучайтириш масаласини кун тартибига чиқарди.
“Zamin”ни Telegram'да ўқинг!
