Фарғона вилоятида содир бўлган мудҳиш жиноят жамоатчиликни ларзага солди. Маълум бўлишича, 29 ёшли эркак пул масаласида чиққан жанжал ортидан ўз онасини шафқатсизларча ўлдирган.
Суд материалларига кўра, воқеа куни эрталаб соат 08:00 атрофида марҳума аёл ва унинг тўнғич ўғли ўртасида молиявий муаммо сабаб тортишув юзага келган. Жанжал кескин тус олиб, айбланувчи қўлидаги болта билан онасининг бош қисмига бир неча бор зарба берган.
Маълумотларда қайд этилишича, у шундан сўнг жиноий ҳаракатини давом эттириб, ҳовлида турган хўжалик пичоғини олган ва аёлнинг жасадига нисбатан шафқатсиз муносабатда бўлган. Кейин эса изини яшириш мақсадида жасаднинг айрим қисмларини хонадон ҳудудига кўмиб қўйган ва воқеа жойидан қочиб кетган.
Мазкур ҳолат Жиноят ишлари бўйича Данғара туман судида кўриб чиқилди. Суд айбланувчини Жиноят кодексининг қасддан одам ўлдиришга оид моддаси билан айбдор деб топди.
Ҳукмга кўра, у 18 йил муддатга озодликдан маҳрум қилиниб, жазони умумий тартибдаги колонияда ўташи белгиланди.
