Фото: ДХХ
Андижон вилоятининг Марҳамат туманида кучли таъсир қилувчи модда сақланган маҳсулотни сотиш билан боғлиқ ҳолат фош этилди. Тезкор тадбир давомида 1991 йилда туғилган фуқаро туман марказидаги савдо мажмуасида шартли харидорга 900 дона “Keto coffee mix” маҳсулотини 6 миллион сўмга сотаётган вақтда ашёвий далиллар билан ушланди.
Суриштирув жараёнида ушбу маҳсулот Андижон шаҳридаги “Жаҳон савдо комплекси”да жойлашган дўкондан харид қилингани маълум бўлди. Шундан сўнг тезкор тадбир давом эттирилиб, Андижон шаҳрида яшовчи, 1987 йилда туғилган фуқарога тегишли савдо нуқтаси ҳам текширилди. Дўкондан яна 480 дона “Keto coffee mix” маҳсулоти олиб қўйилди.
Ашёвий далил сифатида мусодара қилинган маҳсулотларнинг умумий оғирлиги 11 килограммни ташкил этди. Текширув натижасида мазкур маҳсулот таркибида “сибутрамин” кучли таъсир қилувчи моддаси борлиги аниқланди. Қайд этилишича, ушбу модданинг Ўзбекистон ҳудудида муомаласи тақиқланган.
Ҳозирда мазкур ҳолат юзасидан тегишли шахсларга нисбатан жиноят иши қўзғатилган. Тергов органлари маҳсулотларнинг келиб чиқиш манбаси, сотув занжири ва ушбу ҳолатга алоқадор бошқа шахсларни аниқлаш бўйича ҳаракатларни давом эттирмоқда.
Қисқаси, Андижонда “озиш маҳсулоти” кўринишида сотилаётган тақиқланган модда муомаласига чек қўйилди. Бу каби ҳолатлар яна бир бор эслатади: номида “кофе” ёки “фитнес” деган ёзув бўлиши маҳсулот хавфсизлигини англатмайди.
“Zamin”ни Telegram'да ўқинг!
