Поп мусиқа дунёсида афсонавий номи билан ҳануз яшаб келаётган Майкл Жексон билан боғлиқ ҳар бир буюм мухлислар учун қимматли хазина ҳисобланади. Шунинг ёрқин мисолларидан бири сифатида яқинда ўтган аукционда қиролнинг саҳнада кийган ялтироқ пайпоғи 8 минг доллардан ортиқ нархда сотилди. Бу ҳақда PeopleTalk нашри маълум қилди.
Гап кетаяпти 1997 йилдаги “History World Tour” – “Тарихий Жаҳон Гастроли” доирасидаги Франциянинг Ним шаҳрида бўлиб ўтган концерт ҳақида. Жексон ўзига хос саҳна услубига содиқ қолган ҳолда, машҳур “Billie Jean” қўшиғини ижро этиш пайтида стразлар билан безатилган оқ спорт пайпоқларини кийиб чиққан. Кеча якунлангач, гардероб яқинида ерда ётган бу пайпоқни техник ходим кўриб қолади ва йиллар давомида ўзида асраб қўяди.
Вақт ўтиши билан кийимда доғлар пайдо бўлган, ялтироқ стразларининг ранги сариқ тусга айланган бўлса-да, у ҳануз Майкл Жексоннинг саҳнадаги жозибасини ўзида сақлаб қолган “культ буюм” сифатида баҳоланади. Аукционда унга бўлган қизиқиш юқори бўлиб, охир-оқибат 8 минг долларлик келишув билан сотув амалга ошди.
Айтиш жоизки, бу биринчи марта эмаски, Жексонга тегишли саҳна атрибутлари рекорд нархларда сотилаётгани. 2009 йилда Макаодаги казино-курорт “ой юриш” рақсида тақилган ялтироқ қўлқопни 350 минг долларга харид қилган эди. 2023 йилда эса, Парижда ўтган аукционда унинг саҳнага чиқишдан олдин кийган шляпаси 80 минг доллардан ортиққа сотилган.
Бу каби лотлар нафақат коллеционерлар, балки унинг ижодини ардоқлаган миллионлаб мухлислар учун ҳам бебаҳо аҳамиятга эга. Чунки ҳар бир саҳна буюми ортида Майкл Жексоннинг ижодий руҳи ва саҳнадаги афсонавий қуввати яшайди.
«Замин»ни Telegram’да ўқинг!
