Истеъдод ирсийми? Бу савол кўп ҳолларда санъаткор оилаларга қараб бериладиган энг тўғри савол бўлса керак. Ўзбекистон санъат оламида бир-бирига қариндош бўлган машҳур шахслар кўплаб учрайди. Улардан айримлари саҳнада, бошқалари эса камера ортида томошабинни ҳайратда қолдиришда давом этмоқда.
Зокировлар сулоласи: Жавоҳир ва Оҳиста
Ўзбекистон халқ артистлари Гавҳар Зокирова ва Жамшид Зокиров нафақат ўз даврининг машҳур актёр ва актрисаларидан бўлган, балки мустаҳкам ижодий мерос ҳам қолдирган. Уларнинг фарзандлари — Жавоҳир Зокиров актёр, хонанда ва илк поп-рок йўналишидаги гуруҳ асосчиларидан бири. Синглиси Оҳиста Жамшид эса дизайнер ва мусиқачи сифатида танилган. “ДалаҲаст” гуруҳи асосчиси бўлган Оҳиста ижодида руҳий сокинлик ва ҳис-туйғулар чуқур акс этган.
Севара Назархон ва Қундузхон Абдуллаева: саҳнада ва эфирда
Ўзбекистонда хизмат кўрсатган артист, таниқли хонанда Севара Назархон ҳамда “Севимли” телеканали бошловчиси Қундузхон Абдуллаева — холаваччалар. Улардан бири мусиқий саҳнани забт этган бўлса, бошқаси телевидение орқали минглаб томошабинларнинг қалбидан жой олган.
Алишер Файз ва Хуршид Турдиев: ака-ука санъаткорлар
Яна бир истеъдодли жуфтлик — Алишер Файз ва унинг укаси Хуршид Турдиев. Алишер Файз ўзининг самимий тароналари билан машҳур бўлса, укаси ҳам акасидан қолишмайди: турли маданий тадбирларда фаол иштирок этади, хонандалик борасида мустақил йўл танлаган.
Раъно Шодиева ва Рахшона Маҳмудова: она-қиз ижоди
Ўзбек саҳнасининг забардаст актрисаси, хизмат кўрсатган артист Раъно Шодиева — ўзининг кўплаб образлари орқали томошабиннинг қалбидан чуқур ўрин олган. Унинг қизи Рахшона Маҳмудова эса санъат ва медиа соҳасини бирлаштирган ижодкор. У “Ўтов” ва “Новда” фильмларидаги роллари билан танилган, ҳозирда эса YouTube'да “Ошхона Талк” лойиҳасини олиб бормоқда.
«Замин»ни Telegram’да ўқинг!
