Пушкин давлат санъат музейида италиялик машҳур рассом Жованни Франческо Барбери — Герcинонинг “Мадонна ва бола” картинаси илк бор намойиш этилди. Асарни 2025 йил 14 сентябргача музейнинг бош биносида кўриш мумкин.
“TASS” хабарига кўра, тувалнинг тақдири қарийб бир аср давомида номаълум бўлган. Эндиликда у “Пушкин музейининг янги дурдоналари” лойиҳаси доирасида намойиш қилинмоқда. Музей директори Олга Галактионованинг айтишича, Герcинонинг ушбу асари лойиҳанинг дастлабки беш кўргазмасини якунлаб, кейин асосий экспозицияга ўтказилади.
Тарихий манбаларга кўра, аввал расм император Наполеоннинг рафиқаси Жозефинага тегишли бўлган. У уни антиқа буюмлар сотувчиси Людовико Варискодан сотиб олган. Кейинчалик асар қизи Ҳортенсияга ўтган. 1820 йилда эса император Александр I уни Эрмитаж коллекцияси учун Россияга олиб келган.
1924 йилда Ғарбий Европа расмлари Эрмитаждан ҳозирги Пушкин музейига топширилганида, Герcинонинг асари музейга эмас, балки Давлат музей фондининг марказий омборига юборилган. 1980 йилларда эса тувал рассом Иля Глазунов қўлида бўлган, кейинчалик қизи Вера Глазунова томонидан музейга қайтарилган.
Эслатиб ўтамиз, яқинда инглиз аёл 50 йилдан ортиқ вақт давомида қўлида сақлаган XVI асрга оид Антонио Соларионинг “Мадонна ва бола” асарини Италия музейига қайтаришга рози бўлганди.
