Суперлиганинг 20-туридан ўрин олган “Бухоро” – “Қўқон-1912” учрашуви якунлангач, мезбонлар вақтинчалик бош мураббийи Виктор Карпенко матбуот анжуманида иштирок этди. У ўз сўзларида футболчиларнинг ҳаракатини алоҳида таъкидлаб, уларни ғалаба учун борини бергани учун қўллаб-қувватлади.
Карпенко авваламбор жамоага миннатдорчилик билдирди: “Йигитларга катта раҳмат айтаман. Улар бугун ўзини бутунлай ўйинга бағишлашди, ғалабага бўлган хоҳиш ва интилиш жуда юқори эди. ‘Бунёдкор’га қарши баҳсдан сўнг Бухорога қайтдик, кейин Қаршига келишимиз керак бўлди. Икки кун ичида жамоани тўлиқ тайёрлаб бўлмасди, асосий мақсад футболчиларни тиклаш эди. Шунинг учун бугун уларнинг кўрсатган характери бизга ғалаба олиб келди. Бу натижа барча бухоролик мухлисларга ва клуб раҳбариятига муносиб туҳфа бўлди. Жамоа тўғри йўналишда кетяпти, ҳали олдимизда катта йўл бор. Таркибда яхши савиядаги футболчилар бор, уларга ишонч билдирилса, натижалар албатта келади”.
Мураббий ўйин ҳақида ҳам тўхталиб ўтди. Унинг таъкидлашича, биринчи бўлимда “Бухоро” ташаббусни қўлга олди ва бир қатор хавфли вазиятлар яратди. Иккинчи бўлимда эса чарчоқ туфайли кўпроқ ҳимояланишга тўғри келди, аммо шунга қарамасдан ҳисобни очиб ғалабани сақлаб қолишди: “Сабр қилдик ва охирида уч очкони илиб кетдик”.
Анжуманда ҳакамлик масаласи ҳам кўтарилди. Карпенко шундай деди: “Ҳакамларга жиддий эътироз йўқ. Фақат айрим майда фолларга ҳуштак чалинди, шундай бўлса-да, уларнинг ишини яхши баҳолайман. Биз ўйин жараёнида ҳиссиётга берилиб кетдик, лекин умумий ҳисобда ҳакамлар адолатли ишлашди. Рақиблар ҳам буни тасдиқлай олади деб ўйлайман, чунки баҳс тенг ўтди”.
Тажрибали мураббий Жўрабековнинг майдонга туширилиши ҳақида ҳам изоҳ берди: “Шаҳбоз универсал футболчи. У ҳимояда рақибни назорат қилиши ҳам мумкин, ҳужумда агрессив ҳаракатлари билан керакли ёрдамни кўрсатиши мумкин. Бугун у ҳимоядан кўра кўпроқ ҳужумда фаол бўлди. Биз иккинчи голни урмоқчи эдик, аммо битта гол ҳам ғалабага етарли бўлди. Унинг кириши жамоага куч қўшди”.
Шунингдек, мураббийдан қайси футболчи — Ҳайруллаев ёки Амонов ғалабага кўпроқ ҳисса қўшгани ҳақида сўрашди. Карпенко бу саволга жамоавий руҳни устувор қўйган ҳолда жавоб қайтарди: “Бирон футболчини ажратиб кўрсатмайман. Чунки ғалабани бутун жамоа таъминлади. Бугун Равшан Ҳайруллаевнинг туғилган куни эди, йигитлар ғалабани унга бағишлашди. Бир кишининг ўйини эмас, балки барча футболчиларнинг биргаликдаги ҳаракати ғалабани олиб келди”.
Манба: championat.asia
«Замин»ни Telegram’да ўқинг!
