Европа футболи марказида турган УЕФА Чемпионлар лигаси яримфинал баҳси олдидан Франция президенти Эммануэл Макрон ўз прогнози билан ўртоқлашди. Давлат раҳбари Пари Сен-Жермен ҳамда "Бавария" ўртасидаги тўқнашув ҳақида гапириб, парижликларга ишонч билдирган эди.
Макрон L’Équipe'га берган интервьюсида ўзининг шахсий клуби бошқа жамоа эканини яширмади:
«Мен “Марсел” мухлисиман, лекин бугун “ПСЖ” ўйнаяпти. Шунинг учун уларни қўллаб-қувватлайман. Менимча, улар 3:1 ҳисобида ғалаба қозонади», — деб айтган эди у.
Маълумки, мазкур яримфиналнинг илк учрашуви Париждаги Парк де Пренсда бўлиб ўтди. Жавоб баҳси эса 6 май куни Германиядаги Мюнхен Аренада ташкил этилади.
Ҳар икки жамоа ҳам яримфиналга ишончли ўйинлар орқали етиб келди. Парижликлар чоракфиналда "Ливерпул"ни икки ўйин натижасига кўра 4:0 ҳисобида мағлуб этиб, ўз кучини намоён этган эди. Мюнхенликлар эса "Реал Мадрид" устидан 6:4 ҳисобида ғалаба қозониб, яримфиналга йўл олган эди.
Мутахассислар фикрича, бу жуфтлик финалга тенг баҳс сифатида баҳоланди. Ҳар икки жамоа ҳам юқори савиядаги футболчиларга эга ва ҳал қилувчи лаҳзаларда натижани ўзгартиришга қодир.
Қисқаси, Париждаги биринчи ўйин катта интрига ва курашларга бой бўлиши кутилган эди ва шундай ҳам бўлди. Макрон эса ўз тахминини билдириб фақат ҳисобда адашди, холос. Голларга бой ва кескин курашлар остида кечган баҳсда ПСЖ "Бавария"ни 5:4 ҳисобида мағлуб этиб, муҳим ғалабани қўлга киритди.
