Реал Мадрид президенти Флорентино Перез ўзининг шов-шувли матбуот анжуманидан сўнг берган интервюсида Хаби Алонсонинг клубдаги қисқа муддатли фаолияти ва Хосе Моуринёнинг қайтиши ҳақидаги гап-сўзларга изоҳ берди. Перез Алонсони жамоага таклиф қилиш хато бўлмаганини, бироқ мавсумолди тайёргарликсиз ва тиғиз тақвимда жамоа жисмоний ҳолатининг пасайиб кетгани муаммоларни келтириб чиқарганини таъкидлади. Бу ҳақда Goal.com хабар беради.
2025-йил ёзида Баер Леверкусен билан муваффақият қозонганидан сўнг Реал Мадрид бошқарувига келган Хаби Алонсо, Суперкубокдаги мағлубият ва Ла Лигадаги қониқарсиз натижалардан сўнг мавсум ўртасида истеъфога чиқарилганди. Винисиус Жуниор билан юзага келган келишмовчиликлар ҳам унинг истеъфосига сабаб бўлган омиллардан бири сифатида кўрилмоқда.
Алонсо ўрнини эгаллаган Альваро Арбелоа қўл остида ҳам жамоа барқарорликни топа олмади. Копа дел Рей мусобақасидан Албасете томонидан чиқариб юборилиши ва Чемпионлар лигасидаги Бавария қаршисидаги мағлубият Арбелоанинг мавсум охирида клубни тарк этишини деярли аниқ қилиб қўйди.
Матбуотда Хосе Моуринёнинг Реал Мадридга қайтиши ҳақида кўплаб хабарлар тарқалди, ҳатто баъзи экспертлар буни ҳал қилинган масала деб аташди. Бироқ, Флорентино Перез бу миш-мишларни рад этиб, Моуринёнинг клуб тарихидаги хизматларини ҳурмат қилишини, аммо ҳозирча ҳеч қандай қарор қабул қилинмаганини ва мураббийлар тайинлаш масаласида якка ўзи қарор қабул қилмаслигини билдирди.
“Zamin”ни Telegram'да ўқинг!
