Арсенал бош мураббийи Микел Артета Англия Премер-лигасидаги ғалабадан сўнг ўз шогирдларини тарихий дублни қайд этиш орқали ўз номларини клуб тарихига муҳрлашга чақирди. Мутахассиснинг таъкидлашича, жамоа Пари Сен-Жермен клубига қарши бўлиб ўтадиган Чемпионлар лигаси финали олдидан улкан энергия ва тўхтатиб бўлмас шижоатга эга. Бу ҳақда Goal.com хабар беради.
Лондонликлар мавсумнинг сўнгги турида Кристал Пелас устидан 2:1 ҳисобида ғалаба қозониб, ниҳоят Англия Премер-лигаси кубогини бошлари узра баланд кўтаришди. Ушбу муваффақият клуб учун муҳим босқич бўлди, бироқ Микел Артета шанба куни PSJга қарши кечадиган Европа футболининг энг нуфузли баҳси олдидан футболчиларидан янада кўпроғини талаб қилмоқда.
Испаниялик мутахассис байрам тантаналари жамоасининг жанговар руҳини сўндирмаслигига ишончи комил. «Бизга ўша энергия оқими керак ва унга қарши чиқиш катта хато бўлади деб ўйлайман. Биз Будапештда нима қилишимиз кераклиги ва финалга қадар тўпланган барча ақлбовар қилмас кучимиздан қандай фойдаланишимиз ҳақида гаплашиб олдик», — деди Микел Артета.
Кетма-кет уч мавсум иккинчи ўринни эгаллаган жамоа учун ички чемпионатдаги ғалаба улкан ютуқ бўлса-да, Чемпионлар лигаси ҳали забт этилмаган чўққи бўлиб қолмоқда. Арсенал ҳеч қачон ушбу нуфузли турнирда ғолиб чиқмаган ва Микел Артета ҳозирги таркибни тарих саҳифаларига абадий муҳрлаш имкониятини яхши англаб турибди.
«Биз клубимиз тарихида янги саҳифа очишни ва Чемпионлар лигаси кубогини кўтаришни интиқлик билан кутяпмиз», — дея қўшимча қилди мураббий. Унинг фикрича, «чемпион» мақоми жамоага Будапештдаги финалда қўшимча психологик устунлик беради. Микел Артета эндиликда клубдаги ҳар бир ходимнинг вазифаси стандартларни янада юқори кўтариш ва янги марраларни забт этиш эканини таъкидлади.
“Zamin”ни Telegram'да ўқинг!
