Рио Фердинанд: PSJ кучлироқ, аммо Чемпионлар лигасини Арсенал ютади

Манчестер Юнайтед афсонаси Рио Фердинанд Чемпионлар лигаси финали олдидан дадил башорат билан чиқди. Унинг фикрича, гарчи PSJ техник жиҳатдан устунроқ жамоа бўлса-да, Микел Артета шогирдлари якунда ғолиб чиқишади. Бу ҳақда Goal.com хабар беради.

Фердинанд ўзининг YouTube каналида Арсенал нафақат Англия Премер-лигаси, балки Европа чемпионлигини ҳам қўлга киритишига ишонч билдирди. У Луис Энрике бошчилигидаги Париж клубини айни дамда дунёдаги энг чиройли ўйин кўрсатаётган жамоа деб атади.

Бироқ, собиқ ҳимоячи Арсеналнинг ғалабасини стандарт вазиятлар билан боғлади. Унинг сўзларига кўра, PSJ ҳимояси бурчак зарбалари ва жарима тўпларида жуда заиф, Арсенал эса бу борада Премер-лиганинг энг яхши жамоаси ҳисобланади.

"PSJ жисмонан Арсенал билан рақобатлаша олмайди. Агар лондонликлар жарима майдони яқинида стандарт вазиятларга эга бўлса, бу парижликлар учун катта муаммога айланади", — дея қўшимча қилди Фердинанд.