Абрамов: Ўзбекистон терма жамоаси ЖЧ—2022 саралашининг кейинги босқичига чиқса, «Бунёдкор»ни тарк этаман

^{Фото: ЎФА}
Ўзбекистон терма жамоаси ва «Бунёдкор» клуби бош мураббийи Вадим Абрамов «Футбол Плюс» радио эшиттиришидаги суҳбат чоғида бир вақтда ҳам клуб, ҳам терма жамоада ишлаётгани масаласида фикр юритди.

- "Ўз вақтида «Локомотив»дан Ўзбекистон терма жамоасига ўтганимда, менга ҳеч ким клубдан кетиш ҳақида гапирмаган. Ўша вақтда бу қарорни ўзим қабул қилганман, чунки у пайтлар бу қарор тўғри эди. Ўша вақтда «Пахтакор» ва «Бунёдкор» ўртасида кучли рақобат бор эди, шунингдек, бошқа жамоалар ҳам уларга рақобат қила оларди. Футболчилар танлови катта эди, шу сабаб мен ҳам хотиржам эдим.

Бироқ ҳозир бизнинг футболда шундай вазиятки, терма жамоанинг асоси, деярли 11-12 футболчи «Пахтакор» ўйинчиларидан иборат бўлиб қолди. Бу миллий терма жамоа учун катта минус. «Пахтакор» Чемпионлар Лигасида қўшимча юклама олади, ўша-ўша таркиб. Биз нима қиламиз, фақат Шота Арвеладзе билан ўринга ўрин алмашамизми? Уч кун ичида уларга бошқача ўйин услубини сингдира олмайман.

Ўйлашимча, ҳозирда «Бунёдкор» орқали терма жамоага кўпроқ фойда келтира оламан. «Бунёдкор»да терма жамоада тўп сура оладиган ва менинг кўрсатмаларимни бажара оладиган ёш футболчилар пайдо бўлди. Терма жамоа кейинги босқичга ўтиши билан мен ўзим клубни тарк этаман ва фақат Ўзбекистон терма жамоаси билан шуғулланаман.

Тасаввур қилинг, агар «Бунёдкор» бош мураббийи бўлмаганимда нима бўларди? Пандемия шароитида шунча вақт нима қилардим, фақат ўйинларни кузатиб борармидим? Мен у сиз ҳам ҳар бир ўйинни кузатиб бораман. Бунинг нимаси муаммо, билмадим. Мен бўлмасам «Бунёдкор» бундан азият чекади, терма жамоага эса бу ҳеч қандай таъсир ўтказмайди", - дейди Ўзбекистон терма жамоаси бош мураббийи Вадим Абрамов. “Замин” янгиликларини “Twitter”да кузатиб боринг