Apple компанияси 2023 йилда iPhone улагичини ўзгартиради

^{Фото: Josh Edelson /Getty Images}
Американинг Apple компанияси Европа Иттифоқи талаб қилганидек, USB-C улагичига ўтиш учун Lightning улагичидан 2023 йилдаёқ воз кечади. Бу ҳақда Bloomberg агентлиги журналисти Марк Гурман хабар берди.

«Apple ушбу қонунни бажаришга тайёргарлик кўрди. Компания ўзининг энг машҳур гаджетлари учун янги улагичга ўтиш муддатини осонликча тезлаштирди. Масалан, iPhone 15 келаси йил куздаёқ USB-C улагичи билан ишлаб чиқарилади. Бу белгиланган санадан бир йил олдинроқдир», деб ёзди инсайдер.

Apple учун Европа Иттифоқи талаби iPhone 16 эълон қилиниши кутилаётган 2024 йилдан бошлаб кучга киради. Бироқ Гурман, бошқа манбалар қатори, Apple компанияси келаси йилдаёқ улагични ўзгартиришни режалаштираётганига ишончи комил.

Шунингдек, унинг таъкидлашича, Apple компанияси Европа Иттифоқи талабига бўйсунаётганини очиқчасига тан олмоқчи эмас.

«Apple ўз сабабларига кўра USB-C улагичига ўтишга қарор қилганини айтишни истаяпти. Ишончим комил, Apple буни тезкор қувватлантириш ва маълумотларни тезкор узатиш, шунингдек, барча гаджетларни қувватлантиришда ягона ёндашув муҳимлиги билан изоҳлайди», — деб хулоса қилди журналист.

Lightning улагичи фақат Apple компаниясига хос бўлиб, бошқа ишлаб чиқарувчиларнинг гаджетларига ўрнатилмаган. Шунингдек, бошқа ишлаб чиқарувчиларнинг қувватлантирувчи қурилмаларидан ҳам Apple компанияси гаджетларида фойдаланиш имконсиз. USB-C универсал улагичига ўтиш бундай ноқулайликка барҳам берилишини назарда тутади.

Янгиликлар