OpenAI ChatGPT ичида саломатлик ва фаровонлик мавзуларига махсус йўналтирилган янги бўлим — ChatGPT Health’ни тақдим қилди. Яъни, энди “симптом нима дегани?”, “таҳлил жавобидаги рақамлар нормами?”, “шифокор қабулига қандай тайёрлансам?” каби саволлар учун алоҳида, тиниқ ва бир жойга жамланган муҳит пайдо бўлмоқда.
Компания айтишича, саломатлик мавзуси ChatGPT’да энг кўп кўтариладиган йўналишлардан бири: де-идентификация қилинган таҳлилга кўра, ҳар ҳафта 230 миллиондан ортиқ одам дунё бўйлаб соғлиқ ва ҳаёт тарзи ҳақида савол беради. Шу эҳтиёжни ҳисобга олган ҳолда, Health оддий чатдан “бир қадам” юқорига чиқади: маслаҳатлар мавҳум умумий гаплар эмас, фойдаланувчининг контекстига суянишини мақсад қилади.
Энг муҳим янгилик — маълумотларни улаш имкони. Фойдаланувчи тиббий ҳужжатларини (таҳлиллар, қабул хулосалари, тарих) қўшиши, шунингдек Apple Health, Function, MyFitnessPal каби иловаларни боғлаши мумкин. Натижада бот сўнгги кўрсаткичлар, уйқу-фаоллик, овқатланиш одатлари ёки трендлар асосида тушунтириш бериб, шифокорга бериладиган саволлар рўйхатини тайёрлашга, анализларни “қўрқмай” ўқишга ва вақт ўтиши билан ўзгаришларни англашга ёрдам қилади.
Албатта, бу “уй шароитидаги доктор” эмас. OpenAI очиқ айтади: ChatGPT Health ташхис қўймайди ва даволамайди — у шифокорни алмаштириш учун эмас, балки инсонни тиббий суҳбатга тайёр ва хотиржам қилиш учун. Қисқаси, қабулга “мен нима сўрашим керак эди?” деган пушаймонсиз боришга ёрдам.
Махфийлик масаласида ҳам “қаттиқ режим” қўйилган: Health алоҳида майдон сифатида ишлайди — чатлар, файллар ва уланган иловалар маълумоти бошқа мулоқотлардан ажратилган; қўшимча шифрлаш ва изоляция қўлланади; энг муҳими — Health’даги суҳбатлар асосий моделларни ўқитиш учун ишлатилмайди. Хотиралар ҳам алоҳида бўлади ва исталган пайт ўчириш мумкин.
Лойиҳа “ўзимиз ёздик — бўлди” эмас: OpenAI икки йил давомида 60 давлатдан 260+ амалиётчи шифокорлар билан ҳамкорлик қилгани, улар модел жавобларига юз минглаб марта фикр билдирганини қайд этади. Бу жавобларда қачон мутахассисга мурожаат қилишни айттириш, нозик вазиятларда зарар қилмаслик ва оддий тилда тушунтириш каби нуқталарни мустаҳкамлашга қаратилган.
ChatGPT Health босқичма-босқич очилади: аввал кичик гуруҳга берилади, кейин эса яқин ҳафталарда веб ва iOS’да кенгроқ оммага чиқариш режалаштирилган (айрим интеграциялар ҳозирча АҚШдагина, Apple Health учун эса iOS талаб қилинади).
Якун: саломатлик мавзусида “гугллаб адашиб кетиш” ўрнига, маълумотларингиз бир ерда, изоҳлари ҳам сизга мос бўладиган форматга ўтяпти. Келажакда бу бўлим одамларнинг соғлиққа ёндашувини анча онгли қилади — фақат бир шарт билан: докторга боришни кечиктириш учун эмас, докторга тўғри тайёргарлик кўриш учун ишлатиш.
“Zamin”ни Telegram'да ўқинг!
