Россиянинг "Вимпелком" оператори ўз абонентлари учун халқаро роумингда 5G тармоғини ишга туширганини эълон қилди. Компания маълумотларига кўра, янги авлод алоқа технологияси ҳозирда дунёнинг 30 дан ортиқ давлатида, жумладан, Ўзбекистон, Қозоғистон, Туркия, Хитой, БАА ва АҚШ каби машҳур туристик йўналишларда мавжуд. Бу ҳақда Ixbt.com хабар беради.
Ушбу қамров роуминг хизматидан фойдаланадиган мижозларнинг қарийб 80 фоизини қамраб олади. Дунё бўйлаб 5G тармоқлари 2019-йилдан буён фаолият юритиб келаётган бўлса-да, Россиянинг ўзида ушбу технологияни оммавий жорий этиш жараёни ҳали тайёргарлик босқичида.
Россия Рақамли ривожланиш вазирлиги мамлакатда 5G тармоқларининг тўлиқ тижорий ишга туширилишини 2026-йилга мўлжалламоқда. Айни пайтда операторлар инфратузилмани ривожлантириш эвазига частоталарни аукционсиз олиш имкониятини муҳокама қилмоқда. Режага кўра, 2031-йилга бориб Россиянинг барча миллионли шаҳарларини 5G билан қамраб олиш кўзда тутилган.
“Zamin”ни Telegram'да ўқинг!
