Olovga yog‘ sepmang — Xitoy TIV AQSHning kassetali o‘q-dori yetkazib berishi haqida

Kiyevga kassetali o‘q-dorilar yetkazib berish gumanitar muammolarning paydo bo‘lishiga olib keladi, bu Ukrainadagi vaziyatni yanada og‘irlashtiradi, dedi Xitoy Tashqi ishlar vazirligi matbuot kotibi Mao Ning brifingda.

"Ko‘plab davlatlar bunga qarshi chiqishdi, kassetali o‘qlarning mas’uliyatsiz jo‘natilishi gumanitar muammolarga olib kelishi muqarrar. Ularni muvozanatli yo‘l bilan hal qilish, kassetali o‘q-dorilarni berishga vazminlik va ehtiyotkorona munosabatda bo‘lish kerak", - dedi diplomat.

Uning eslatishicha, Pekin doimo muzokaralarni inqirozni hal qilishning yagona yo‘li deb hisoblagan.

"Tegishli tomonlar olovga yog‘ sepmasligi, Ukraina inqirozining keskinlashuviga olib keladigan qarama-qarshiliklarni kuchaytirmasligi kerak", - dedi Mao Ning.

O‘tgan hafta Vashington Ukraina Qurolli kuchlariga kassetali o‘q-dorilar topshirishini e’lon qildi. Ushbu turdagi raketalar 123 davlat tomonidan ratifikatsiya qilingan xalqaro konvensiya bilan taqiqlangan. Ularga AQSH, Xitoy, Rossiya, Ukraina kirmaydi.

Rossiya Mudofaa vazirligi ma’lumotlariga ko‘ra, Ukraina Qurolli kuchlari allaqachon Donetskni o‘qqa tutish uchun ulardan foydalangan.

Kassetali o‘q-dorilar o‘zini o‘zi yo‘q qiladigan qurilmalar bilan ta’minlanmagan. AQSH harbiylariga ko‘ra, ularning beshdan 14 foizigacha bo‘lgan qismi umuman portlamasligi mumkin, chunki ular uzoq vaqtdan beri omborlarda saqlangan. Bunday holda ular mojaro tugaganidan keyin ham tinch aholiga tahdid soladigan minalar bo‘ladi.

Hatto AQSH Kongressi ham Ukrainaga bunday qurollar yetkazib berilishiga qarshi chiqqan. Baydenning AQSH Demokratik partiyasi a’zolari mudofaa to‘g‘risidagi qonunga kassetali o‘q-dorilarni berishni taqiqlovchi tuzatish tayyorlamoqda. AQSH Kongressi Vakillar Palatasining Minnesota shtatidan a’zosi Ilhan Umar fikricha, ulardan foydalanish inson huquqlarini buzadi.

Rossiya TIV matbuot kotibi Mariya Zaxarovaning aytishicha, AQSHning Ukrainaga kassetali o‘q-dorilar yetkazib berishi tinch aholi uchun xavf tug‘diradi va inqirozni cho‘zishga qaratilgan.

Rossiya va Ukraina urushi Yangiliklar