Bayden va Zelenskiy Fransiyada Ukrainadagi vaziyatni muhokama qiladi

^{Foto: AP}
AQSH prezidenti Jo Bayden Ukraina prezidenti Volodimir Zelenskiy bilan Fransiyada ittifoqchilarning Normandiyaga qo‘ngani 80 yilligiga bag‘ishlangan marosimlarda uchrashishni rejalashtirmoqda. Bu haqda AQSH prezidentining milliy xavfsizlik bo‘yicha maslahatchisi Jeyk Sallivan 4 iyun kuni kechqurun Parijga parvoz qilgan Air Force One samolyoti bortida ma’lum qildi.

Sallivanning so‘zlariga ko‘ra, Bayden Zelenskiy bilan Ukrainadagi vaziyat va Qo‘shma Shtatlar Kiyevni qo‘llab-quvvatlashni qanday davom ettirishi hamda kuchaytirishi mumkinligini muhokama qilmoqchi. Maslahatchining qo‘shimcha qilishicha, Amerika va Ukraina prezidentlari navbatdagi shaxsiy uchrashuvi kelasi hafta – Italiyadagi G7 sammitida bo‘lib o‘tishi kerak.

Ukraina Rossiyadagi harbiy nishonlarga zarba berish uchun Amerika qurollaridan foydalandimi, degan savolga Sallivan Ukraina qurolli kuchlari nomidan gapirishni istamasligini aytdi. Uning aniqlik kiritishicha, Vashington Ukraina askarlarini tayyorlash uchun Ukrainaga harbiy maslahatchilar yoki instruktorlar yuborishni rejalashtirmayapti.

Volodimir Zelenskiy 6 iyun kuni Fransiyaga ikki kunlik rasmiy tashrif bilan keladi. Shu kuni u yerda ittifoqchilarning Normandiyaga qo‘ngani 80 yilligiga bag‘ishlangan tantanalar o‘tkaziladi. 7 iyun kuni Ukraina yetakchisini Yelisey saroyida Fransiya prezidenti Emmanuel Makron qabul qilishi kutilmoqda. Makron bayramdan keyin Jo Bayden bilan shaxsan uchrashishi ham rejalashtirilgan.

Rossiya 6 iyun kuni Fransiyada o‘tkaziladigan xotira tadbirlarida ishtirok etishga taklif qilinmadi.

Bayden Ukrainaning NATOga qo‘shilishi haqida

Bir kun avval, 4 iyun kuni Time jurnali Jo Bayden bilan intervyusini e’lon qildi, 28 may kuni bo‘lib o‘tgan suhbatda Bayden, xususan, NATO u prezident lavozimini egallagan paytdagidan ancha kuchli ekanligini aytdi. Shu bilan birga, Rossiyaning Ukrainaga qarshi urushidagi «tinchlik», uning so‘zlariga ko‘ra, «Rossiya hech qachon Ukrainani bosib ololmasligi» kafolatini anglatishi kerak. «Va bu Ukraina NATOning bir qismi ekanligini anglatmaydi. Bu degani, biz ular bilan, shuningdek, qurol-yarog‘ yetkazib beradigan boshqa davlatlar bilan ham munosabatlarni davom ettiramiz, shunda ular kelajakda o‘zlarini himoya qila oladi», - deya ta’kidladi AQSH prezidenti.

Avvalroq Jo Bayden o‘z saylovoldi tadbirlari tufayli Volodimir Zelenskiyning taklifini qabul qila olmasligini va Shveysariyadagi Ukraina bo‘yicha tinchlik sammitida shaxsan ishtirok eta olmasligini aytgan edi. Ushbu anjumanda Qo‘shma Shtatlar tomonidan vitse-prezident Kamala Xarris va Jeyk Sallivan ishtirok etadi. “Zamin”ni Telegramʻda oʻqing!