AQSHning F-22 qiruvchi samolyotlari eskadroni Eron hujumiga qarshi turish uchun Isroilga yetib keldi

^{Foto: Centcom}
AQSHning F-22 qiruvchi samolyotlari guruhi 8 avgust kuni Yaqin Sharqqa yetib kelgan. Bu haqda AQSH Markaziy qo‘mondonligi tarqatgan ma’lumotga asoslanib, Anadolu nashri xabar berdi.

Manbada aytilishicha, AQSH o‘z samolyotlarini Eron yoki uning ittifoqchilari tomonidan umumiy eskalatsiya boshlanishiga qarshi turish uchun jo‘natgan. Tel-Aviv atrofida favqulodda vaziyat sodir bo‘lgan taqdirda AQSH samolyotlari Isroil osmonini himoya qilishi aytilgan.

“F-22 samolyotlari Eron yoki uning ishonchli vakillari tomonidan mintaqaviy kuchayish ehtimolini yumshatish uchun Yaqin Sharqdagi AQSH kuchlarini pozitsiyasini o‘zgartirish dasturining bir qismidir. ,Maqsad urush boshlash emas, balki kuchlarni muvozanatlashtirish orqali urushning oldini olish”, deyiladi AQSH Markaziy qo‘mondonligi bayonotida.

31 iyul kuni Eron poytaxti Tehronda HAMAS siyosiy byurosi rahbari Ismoil Haniyaning o‘ldirilishi va Isroil tomonidan Bayrutda “Hizbulloh”ning yuqori martabali qo‘mondoni Fuad Shukrning yo‘q qilinishi Yaqin Sharqda keskinlikni avjiga chiqardi. Qurollanish va hujum haqidagi da’volar kuchaydi. Bunday xavfli vaziyatda esa AQSH Yaqin Sharqqa harbiy qismlar jo‘nata boshladi.

Eron va “Hizbulloh” Ismoil Haniya hamda Fuad Shukr o‘limi uchun qasos olinishini aytgan. Ikki tomon ham uyushtirilgan hujumlarda Isroilning “Mossad” ayg‘oqchilik xizmatini ayblagan. Isroil ayblovlarni rasman tan olmagan.

Vashington ayni paytda urush vahimasi ostida Isroil mudofaasini kuchaytirishda davom etmoqda. Hozirga qadar ko‘plab harbiy kemalar, quruqlik texnikasi, o‘rta masofali raketalar Isroil atrofiga joylashtirilgan. AQSH Davlat departamenti Yaqin Sharq hukumatlari bilan bog‘lanib, keskinlikka intilishdan qochishga, siyosiy vahima ko‘tarmaslikka chaqirgan. “Zamin” yangiliklarini “Instagram”da kuzatib boring