Kreml Tramp va Harrisni Putin familiyasini “tinch qo‘yishga” chaqirdi

^{Foto: Bloomberg}
Rossiya prezidentining matbuot kotibi Dmitriy Peskov AQSHda ichki siyosiy kurash vositalaridan biri sifatida foydalanilayotgan Rossiya prezidenti Vladimir Putin nomini tinch qo‘yishga chaqirdi.

“Putin familiyasi, ta’bir joiz bo‘lsa, Qo‘shma Shtatlarning ichki siyosiy kurashidagi vositalardan biri sifatida qo‘llanadi, bu bizga haqiqatan ham yoqmaydi va ular prezident nomini tinch qo‘yishlariga umid qilamiz”, dedi Peskov jurnalistlarga.

Peskovning aytishicha, Kreml munozarani Moskva vaqti bilan kechasi bo‘lib o‘tgani uchun kuzatib bora olmagan.

“Ammo ertalab, albatta, biz ushbu munozaralar davomida aytilgan turli bayonotlar bilan yangi xabarlarni ko‘rdik”, deya qo‘shimcha qilgan u.

Joriy yilning 11 sentyabrga o‘tar kechasi Filadelfiyada AQSH prezidentligiga nomzodlar – demokrat Kamala Harris va respublikachi Donald Tramp o‘rtasida teledebat bo‘lib o‘tdi. Bahs ABC telekanali tomonidan tashkil etildi. Saylov 5 noyabr kuni bo‘lib o‘tishi kutilmoqda.

Debat davomida Putin familiyasi 12 marta, xususan, sakkiz marta Tramp va to‘rt marta Harris tomonidan tilga olingan. Bundan tashqari, Tramp va Harris Rossiya hamda Ukraina haqida 11 marta gapirgan.

Debat chog‘ida boshqa masalalar qatori Ukrainadagi mojaro ham muhokama qilingan. Tramp g‘alaba qozonsa, u yerdagi jangovar harakatlarni to‘xtatishga yana bir bor va’da bergan. “Zamin” yangiliklarini “Odnoklassniki”da kuzatib boring