Rossiya Suriyadagi harbiy kuchlari sonini qisqartirmoqda

^{Foto: FT}
Suriyada hokimiyatni qo‘lga olgan “Hay’at Tahrir ash-Shom” (HTSH) siyosiy byurosi a’zosi Kamol Lababidiy so‘nggi kunlarda Rossiya Suriya poytaxti Damashq atroflaridan kamida 400 nafar harbiy xizmatchini Xmeymim aviabazasiga ko‘chirgani haqida xabar berdi.

Lababidiyga ko‘ra, Rossiya qo‘shinlarining olib chiqilishi Suriyaning yangi hukumati bilan kelishilgan holda amalga oshirilgan. Bu Suriya armiyasining Damashq yaqinidagi Qudsayeda joylashgan to‘rtinchi diviziyasi shtab-kvartirasida avvalroq joylashtirilgan rossiyalik harbiylar va Rossiyaning Damashqdagi elchixonasida xizmat qilgan harbiy xizmatchilarni o‘z ichiga oladi.

FT nashri tomonidan ko‘rib chiqilgan videotasvirda 100 ga yaqin harbiy transport vositalari kolonnasi, jumladan, zirhli mashinalar, yuk mashinalari, yonilg‘i tashuvchi sisternalar va ko‘chma tibbiy bo‘linmalar aks etgan.

Lababidiyning ta’kidlashicha, Xmeymim bazasidan harbiylar samolyotlar orqali Rossiyaga olib ketilgan. Uning so‘zlariga ko‘ra, hozirgi vaqtda Suriyada hokimiyatni egallab olgan qo‘zg‘olonchilarning qarorgohiga aylangan Damashqdagi Four Seasons mehmonxonasida Rossiya harbiylarini mamlakatning boshqa hududlaridan evakuatsiya qilish bo‘yicha muzokaralar davom etmoqda.

Rossiya TIVning aniqlik kiritishicha, “Rossiya, shuningdek, o‘z diplomatik vakolatxonalari xodimlarining bir qismini va Belarus, Shimoliy Koreya va Abxaziya diplomatik vakolatxonalari xodimlarini Damashqdan olib chiqqan”.

“15 dekabr kuni Rossiya Mudofaa vazirligi Harbiy havo kuchlarining maxsus reysi bilan Xmeymim aviabazasidan Damashqdagi Rossiya tashqi vakolatxonalari xodimlarining bir qismi Chkalovskiy aeroportiga olib chiqildi. Belarus, Shimoliy Koreya va Abxaziya diplomatik vakolatxonalari xodimlari ham evakuatsiya qilindi”, deyiladi xabarda.

Evakuatsiya sabablari aytilmagan, biroq xabarda Rossiyaning Damashqdagi elchixonasi o‘z ishini davom ettirayotgani ta’kidlangan. “Zamin” yangiliklarini “Instagram”da kuzatib boring