Georgiy Tixiy: “Ukraina ikkinchi tinchlik sammiti uchun hamma narsani tayyorlab qoʻydi”

^{Foto: My.ua}
Ukraina ikkinchi tinchlik sammiti uchun hamma narsani tayyorladi, biroq bu tadbir samarali oʻtishi uchun harakat qilishda davom etmoqda. Bu haqda Ukraina Tashqi ishlar vazirligi spikeri Georgiy Tixiy brifingda ma'lum qildi.

“Hozirda juda keng koʻlamli, tarixiy jarayonlar sodir boʻlmoqda. AQShda yangi ma'muriyat ish boshlash arafasida. Tinchlik formulasi urushni adolatli tugatish haqidagi Ukraina qarashlarining asosi boʻlib qolmoqda. Ukraina ikkinchi tinchlik sammiti uchun hamma narsani tayyorlab qoʻydi. Barcha tematik konferentsiyalar oʻtkazildi, Tinchlik formulasi bandlari boʻyicha umumiy pozitsiyalar kelishildi. Ya'ni hozirda Ukraina kuchli diplomatik pozitsiyada, deyish mumkin, chunki unda hamma narsa tayyor”, dedi Tixiy.

Spiker mazkur sammit samarali boʻlishi uchun kuchli tayyorgarlik zarurligini, avvalroq e'lon qilingan sanalar taxminiy ekanini ta'kidladi.

“Ukraina har doim hamma narsani imkon qadar tezroq bajarishga harakat qiladi. Bu bizning umumiy siyosatimiz. Ammo tinchlik sammitini koʻr-koʻrona oʻtkazib boʻlmaydi. Puxta tayyorgarlik kerak”, deya qoʻshimcha qildi Tixiy.

Birinchi global tinchlik sammiti joriy yilning iyun oyida Shveytsariyada boʻlib oʻtgan edi. Unda 90 dan ortiq davlat vakillari qatnashgan. Biroq sammitga Rossiya taklif etilmagani ma'lum boʻlgach, bir qancha davlatlar tadbirga quyi darajadagi delegatsiyalarni yuborgan. “Zamin” yangiliklarini “Odnoklassniki”da kuzatib boring