Putin Toʻqaev bilan AZAL samolyoti halokatiga bogʻliq vaziyatni muhokama qildi

^{Foto: “RIA Novosti”}
Rossiya prezidenti Vladimir Putin Qozogʻiston prezidenti Qosim-Joʻmart Toʻqaev bilan telefon orqali suhbat qildi. Muloqot Moskva tashabbusi bilan amalga oshirildi, deb xabar bermoqda Kreml matbuot xizmati.

“Davlat rahbarlari 25 dekabr kuni Oqtov shahri yaqinida Ozarbayjon havo yoʻllari aviakompaniyasi samolyotining halokati munosabati bilan qurbonlar oilasiga ta'ziya bildirishdi. Ushbu samolyotda Rossiya va Qozogʻiston fuqarolari ham boʻlgan”, deyiladi xabarda.

Barcha tafsilotlarni tekshirish bilan shugʻullanayotgan Qozogʻiston hukumat komissiyasi samolyot halokati joyida topilgan “qora quti”ni oʻqib chiqish uchun Rossiya, Ozarbayjon va Braziliyadan mutaxassislarni jalb etadi.

“Qozogʻiston hududida amalga oshiriladigan bu ishlar xolisona va shaffof tarzda olib boriladi”, deyiladi xabarda.
Shuningdek, xabarda ta'kidlanishicha, ikki davlat rahbarlari Ozarbayjon samolyoti bilan bogʻliq fojiali hodisaning barcha holatlarini tekshirish masalalari boʻyicha ham, Rossiya—Qozogʻiston hamkorligini yanada rivojlantirishning dolzarb mavzulari boʻyicha ham doimiy aloqada boʻlishadi.

Qozogʻistondagi aviahalokat

Bokudan Grozniyga J28243 reysini amalga oshirayotgan Embraer 190 samolyoti 25 dekabr kuni ertalab Qozogʻistonning Oqtov shahri yaqinida halokatga uchradi. Dispetcherlar Grozniy va Maxachqal'ada qoʻnishni rad etganidan keyin layner majburiy qoʻnishni amalga oshirishga urindi. Oqtov aeroportiga bir necha kilometr qolganda u qulab tushdi, portlab, yonib ketdi.

Burun qismi toʻliq yongan, dum qismida esa omon qolganlar boʻlgan. Kamida 29 nafar tirik qolgan yoʻlovchi aynan shu qismda boʻlgan. Ular kasalxonaga olib kelingan. Azerbaijan Airlines samolyoti qulashi oqibatida 38 kishi halok boʻlgan. Samolyot bortida jami 67 kishi — 62 yoʻlovchi va besh ekipaj a'zosi boʻlgan. “Zamin” yangiliklarini “Telegram”da kuzatib boring