AQShda temiryoʻl koʻprigi poyezd harakati vaqtida qulab tushdi

^{Foto: AFP}
AQShda Meri daryo ustidan oʻtgan koʻprik yuk poyezdi oʻtayotgan vaqtda qulab tushdi. KPTV telekanalining ma'lum qilishicha, karbamid ortilgan 19 ta vagondan biri suvga qulagan.

Koʻngilsiz hodisa Oregon shtatidagi Korvallis shahrida sodir boʻlgan. Hech kim jabrlanmagan, biroq politsiya suvga vagondagi moddalar tarqalishi mumkinligi sabab aholini daryoga tushmaslikka chaqirgan.

Hozirda huquq-tartibot organlari koʻprikning qulash sababini aniqlash boʻyicha tergov harakatlarini olib bormoqda.

Karbamid — kimyoviy birikma boʻlib, asosan azotli oʻgʻit sifatida ishlatiladi.

Oktyabr oyida Norvegiyada yoʻlovchi poyezdi relsdan chiqib ketgandi. Hodisa mamlakatning Xemnes munitsipalitetida sodir boʻlgan va bir necha kishiga jarohat yetgan edi.

Dekabrda esa Murmansk oblastida Kandalaksha rayonidagi Knyajaya stantsiyasi yaqinida Murmansk — Sankt-Peterburg yoʻnalishi boʻylab harakatlanayotgan 11-sonli yoʻlovchi poyezdi bilan yuk poyezdi toʻqnashib ketgandi.