Trampning inauguratsiyasi joyi oʻzgarishi minglab odamlarni hayratda qoldirdi

AQShning saylangan prezidenti Donald Trampning inauguratsiyasi joyi ob-havo sharoiti tufayli boshqa joyga koʻchirilishi haqidagi bayonoti minglab odamlarni hayratda qoldirdi. Bu haqda “Washington Post” yozmoqda.

Tramp inauguratsiyani sovuq ob-havo tufayli yopiq joyga koʻchirishni buyurganini tasdiqladi, tadbirning asosiy qismi Kapitoliy rotundasida boʻlib oʻtadi. Ochiq manbalarga koʻra, 20 yanvar kuni Vashingtonda minus ikkidan minus etti darajagacha, kechki payt esa minus 12 darajagacha sovuq boʻlishi kutilmoqda.

“Huquq-tartibot idoralari xodimlari favqulodda yigʻilishlarga chaqirildi. Kongress a'zolari oʻzgarishlar haqida OAVdan bildi, keyin esa tadbirga chiptalari boʻlgan saylovchilarning yuzlab qoʻngʻiroqlariga javob berishdi”, - deyiladi xabarda.

Qayd etilishicha, Tramp qasamyod qabul qiladigan Kapitoliy rotundasi ichidagi ishchilar tezda yangi tribuna yigʻishga kirishdi. Butun mamlakat boʻylab samolyot chiptalarini sotib olgan va Vashingtonda mehmonxonalarni bron qilgan minglab odamlar poytaxtga sayohat rejalarini qayta koʻrib chiqishdi.

Nashrning xabar berishicha, joylashuv oʻzgarishi e'lon qilingandan soʻng, odamlar tarmoqlarda Vashingtonga borishdan voz kechish yoki endi koʻproq televizion auditoriyaga moʻljallangan tadbirdan unumli foydalanish haqida bahslasha boshlagan. Ba'zilar endi yaroqsiz boʻlgan inauguratsiya chiptalaridan hunarmandchilikda foydalanishni rejalashtirganliklarini aytishgan. Boshqalar marosimni tomosha qilish uchun mehmonxonalar lobbilari va yaqin atrofdagi katta ekranli barlarda yigʻilishni taklif qilishgan. “Zamin” yangiliklarini “Telegram”da kuzatib boring