Asirlar almashuvi: nimalarga e'tibor berish kerak?

19 yanvar kuni reja qilinganidan 3 soat kechikib boʻlsa-da, Isroil va HAMAS oʻrtasidagi oʻt ochishni toʻxtatish kelishuvi amalga osha boshladi. Har ikki tomon sulhni oʻzining gʻalabasi deb koʻrsatishga intildi, ammo bu haqda keyinroq gaplasharmiz. Hozir asirlarni almashuv jarayoni qanday kechganiga e'tibor beramiz.

Gʻazodan Isroilga

Demak, sulhda kelishilgan talablarni bajarishni HAMAS boshladi. 19 yanvar kuni 24 yoshli Romi Gonen, 28 yoshli Emili Damari va 31 yoshli Doron Shteynbrexerni Isroilga qaytardi. HAMAS asirlarni xalqaro «Qizil Xoch» jamiyati shifokorlariga topshirdi. Jarayon Gʻazo xarobalarida oʻtdi va uni minglab falastinliklar kuzatib turdi. Bu sulhning boshlanishi boʻlgani uchun ular bayramona kayfiyatda edi.

Bu jarayonni, albatta, tomosha qilishingiz kerak, shu uchun videoda aynan oʻsha kadrlarni koʻrsatganmiz. Asirlarni olib kelgan HAMASchilarga e'tibor bering. Videolarda ular guruhning elit boʻlinmasi jangchilari ekani aytiladi, ya'ni HAMAS «spesnazi». Ularning soni juda koʻp. Endi ular minib kelgan mashinalar, minivenlarga qarang: Hyundai, Kia, ba'zi mashinalar Fordʼga ham oʻxshaydi.

Endi savol paydo boʻladi: Isroil Gʻazoda 50 mingga yaqin 7 oktyabrdagi hujumga hech qanaqa aloqasi boʻlmagan tinch aholi vakillari, 17 mingdan ortiq norasida bolalarni oʻldirib, kimga qarshi urush qildi oʻzi? Netanyahu ma'muriyati HAMAS yakson qilingani haqida bir necha bor bayonot berdi, lekin yakson qilingan HAMASning ikki metrli jangchilardan iborat «elit brigadasi» qayerdan paydo boʻldi? Va yana oʻsha savol: Gʻazoda har qanday infratuzilma, aloqa vositalari ishlashiga imkon beradigan tarmoqlar yoʻq qilingan bir vaqtda HAMASning sahifalari bu jangchilar haqida videolarni qanday e'lon qilmoqda? Isroil kimga qarshi urushdi axir?

Olomon asirlar almashiladigan vaqtda nazoratdan chiqib ketdi, chunki ularni mashinalarga yaqinlashtirmaslik uchun politsiya yoki boshqa xizmatlar yoʻq edi. Bu ishni miltiq koʻtargan HAMASchilar bajargandek boʻldi, ammo ular ham olomonni toʻxtatib qololmadi. Gʻazoliklar HAMAS va «Qizil Xoch» mashinalari ustigacha chiqib ketishdi.

Asirlar «Qizil Xoch» mashinasiga oʻtirayotganda HAMASchilar ularni jonli devor boʻlib oʻtkazib yubordi. Mashina joʻnab ketgach, gʻazoliklar HAMAS jangchilarini olqishladi, Yahyo Sinvar nomini ulugʻlab hayqirishdi, jangchilar bilan rasm tushdi. Asirlarni olib kelgan guruh vakillarining barchasi yuzini bogʻlab olgandi.

Keyinroq HAMAS ham oʻz sahifasida almashuv videosini e'lon qildi. Unda asirlar mashinaga olib chiqilayotgan holat ham koʻrsatilgan. Bu videolarda olomon koʻrinmaydi, tabiiyki asirlar koʻzdan pana joyda saqlangan. HAMAS e'lon qilgan kadrlarda uch isroillik qiz yaxshi kayfiyatda mashinaga oʻtirgan. HAMASchilar ularga bittadan qogʻoz sumka bergan. Aftidan, uning ichida qandaydir sovgʻa-salomlar yoki biror kimga yozilgan xat boʻlgandir.

Asirlarni TsAHAL maxsus kuchlari va Shin-Bet zobitlari qabul qilib, Isroilga olib ketishdi. Asirlar Gʻazoga yaqin boʻlgan Reim harbiy bazasida oila a'zolari bilan koʻrishgan.

Isroil qamoqxonalaridan Falastinga

HAMAS asirlarni qoʻyib yuborgach, Isroil kelishuvga koʻra oʻz qamoqxonalarida saqlanayotgan 90 nafar falastinlikni ozod qildi. Ular almashuvdan avval Quddusdagi Ofer qamoqxonasiga olib borildi.

Isroil oʻz qamoqxonalaridan qanday falastinliklarni qoʻyib yuborganiga diqqat qiling: 69 nafar ayol kishi, ular orasida voyaga etmagan qiz bola ham bor va 12 erkak. Voyaga etmagan qiz nima ish qilgan boʻlishi mumkinki, u Isroil qamoqxonasiga tashlangan va asirlarga almashilmoqda?

Isroil qoʻyib yuborgan 78 mahbus Gʻarbiy sohilga, 12 nafari esa Sharqiy Quddusga yuborilgan. Bu almashuv HAMAS va Isroil oʻrtasidagi kelishuvning birinchi bosqichi doirasida amalga oshdi. Biz bu jarayonni diqqat bilan kuzatib boramiz va e'tiborga molik holatlardan, albatta, sizni boxabar qilamiz.

“Zamin” yangiliklarini “Telegram”da kuzatib boring