Daniya Arktikadagi oʻz mavjudligini mustahkamlash uchun katta mablagʻ ajratmoqda

Daniya hukumati, shuningdek, qirollik tarkibiga kiruvchi Farer orollari, Grenlandiya, Arktika va Shimoliy Atlantika mintaqasidagi mavjudligini kuchaytirish uchun 14,6 milliard krona (taxminan 1,9 milliard yevro) ajratish boʻyicha kelishuvga erishdi. Bu haqda 27 yanvar kuni Daniya Mudofaa vazirligi ma'lum qildi.

Yangi kema va dronlar bilan kuchaytiriladi

Ushbu mablagʻlar uchta yangi Arktika kemasini sotib olishga yoʻnaltiriladi. Mazkur kemalar Grenlandiyada missiyalarni amalga oshirish uchun vertolyot va dronlarni tashishga moslashtirilgan. Shuningdek, uzoq masofadan kuzatuv uchun ikki dona zamonaviy uchuvchisiz uchish apparati (dron) xarid qilinadi, ular kengaytirilgan tasvirlash imkoniyatlariga ega boʻladi.

Razvedka va xavfsizlikni kuchaytirishga alohida e'tibor

Boshqa mablagʻlar sun'iy yoʻldosh vositalari va erdan kuzatish uskunalarini takomillashtirish orqali razvedka samaradorligini oshirishga yoʻnaltiriladi. Bundan tashqari, mintaqadagi aholini favqulodda vaziyatlarga tayyorlash boʻyicha tadbirlar ham moliyalashtiriladi.

Kelgusi rejalar

Arktika mintaqasida mudofaa salohiyatini yanada mustahkamlash maqsadida 2025 yil oxirida yana bir shartnoma imzolanishi rejalashtirilgan.

Grenlandiyaga AQSh qiziqishi

Shuningdek, Financial Times nashrining 24 yanvardagi xabarlariga koʻra, AQSh prezidenti Donald Tramp Daniya bosh vaziri Mette Frederiksen bilan telefon suhbati chogʻida Grenlandiyani qoʻlga kiritish niyatini jiddiy ekanini bildirgan. Suhbat 45 daqiqa davom etgan va nashr manbalariga koʻra, Tramp muzokaralar paytida oʻzini agressiv tutib, qarama-qarshi kayfiyatda boʻlgan.

Frederiksen AQSh prezidentiga Grenlandiyaning Daniya qirolligi tarkibidagi avtonom hudud ekanligini ta'kidlab, orolning "sotilmasligi"ni aniq tushuntirganini ma'lum qilgan. Suhbat vaqtida, Tramp Daniyaning harbiy bazalar va foydali qazilmalar boʻyicha hamkorlik takliflariga qiziqish bildirmagan.

Evropa Ittifoqi rasmiylari FT’ga suhbat nihoyatda murakkab va nizoli oʻtganini ta'kidlashgan. “Zamin” yangiliklarini “Telegram”da kuzatib boring