5 ming yillik mumiya: Peruda sirli ayol jasadi topildi

Peruda arxeologlar tomonidan noyob va muhim topilma aniqlandi: qadimiy Karal-Supe sivilizatsiyasiga oid bo‘lgan mumiyalashgan ayol jasadi topildi. Bu haqda mamlakat Madaniyat vazirligi xabar tarqatdi.

Mazkur mumiya taxminan 5 ming yil muqaddam yashagan, deb taxmin qilinmoqda. Mutaxassislarning aniqlashicha, yoshi 25-30 atrofida bo‘lgan ayol jasadi ancha yaxshi saqlangan holda topilgan. Hatto uning sochlari, tirnoqlari va terisi ham buzilmagan.

Qadimiy jasad mamlakat shimolida joylashgan Aspero arxeologiya hududida topildi. Bu yer Karal-Supe sivilizatsiyasining muhim markazlaridan biri bo‘lib, miloddan avvalgi 3000–1800 yillarda mavjud bo‘lgan.

Mumiyo bir nechta maxsus tayyorlangan matolarga o‘ralgan holda saqlangan. Jumladan, u paxta va qamishdan yasalgan bo‘yralar bilan o‘ralgan edi.

Arxeologlarning qayd etishicha, bu ayolning qabrida ko‘plab qimmatbaho buyumlar ham bor. Ular ichida qamishdan ishlangan savatlar, naqshinkor igna, Amazoniya dengiz chig‘anog‘i, turli xil rangli taqinchoqlar bilan bezatilgan qush tumshug‘i, junli mato, baliq ovlash uchun to‘r, taxminan 30 dona shirin kartoshka va to‘quvchilikda ishlatiladigan asbob-anjomlar aniqlandi.

Mumiyoning kiyim-kechaklari va qabrdan topilgan buyumlarni tahlil qilgan olimlar bu ayol o‘z davrida yuqori ijtimoiy maqomga ega bo‘lgan deb hisoblashmoqda. Avval ham Aspero hududidan to‘rtta shu kabi yuqori maqomga ega bo‘lgan inson qabri aniqlangan edi.

Mutaxassislarning fikricha, bu kabi topilmalar qadimgi Karal-Supe sivilizatsiyasining jamiyat sifatida shakllanganini va ularda ijtimoiy guruhlar bo‘linganligidan dalolatdir. Bu esa ushbu sivilizatsiya haqida ilmiy qarashlarni yanada boyitishga xizmat qiladi.

Siz nima deb o‘ylaysiz — bu kabi topilmalar insoniyat tarixi haqidagi qarashlarimizni qanchalik o‘zgartiradi? “Zamin”ni Telegramʻda oʻqing!