AQSHda tarixiy operatsiya: inson qovug‘i muvaffaqiyatli ko‘chirildi

Janubiy Kaliforniyada tibbiyot sohasida yangi davrni boshlagan ilk muvaffaqiyatli qovuq transplantatsiyasi amalga oshirildi. Bu haqda The New York Times nashri xabar berdi.

Qovuq saratoni bilan og‘rigan bemorga umid

May oyi boshida Kaliforniya universiteti hamda Janubiy Kaliforniya universiteti shifokorlari tomonidan amalga oshirilgan operatsiyada 41 yoshli Oskar Larrainzar nomli bemor ishtirok etdi. U qovuq saratonining kam uchraydigan turidan aziyat chekardi.

“Men doim portlashga tayyor bomba edim. Endi esa yashashga umidim bor”, — dedi Oskar o‘zining ehtirosli izohida.

Kelgusi bosqich — klinik sinov va keng tadqiqot

Mazkur jarrohlik muvaffaqiyatli yakunlangani shifokorlar uchun yangi eshiklarni ochdi. Endi ular yana to‘rt nafar bemorga qovuq ko‘chirib o‘tkazishni mo‘ljallamoqda. Ushbu sinov muvaffaqiyatli yakunlansa, bu yo‘nalishda keng masshtabli tadqiqot boshlanishi kutilmoqda.

Mutaxassislar bu jarayon siydik pufagi bilan bog‘liq og‘ir xastaliklarga qarshi kurashda muhim qadam bo‘lishi mumkinligini ta’kidlashmoqda.

Nega transplantatsiya alternativadan ustun?

Hozirgacha qovuqi olib tashlangan bemorlarda peshob chiqarish funksiyasini saqlab qolish uchun turli texnikalardan foydalanib kelingan. Masalan:

- ichakning bir qismidan yasalgan sun’iy naychalar;
- qorin tashqarisida joylashgan maxsus xaltachalar;
- tananing ichiga joylashtiriladigan neoqovuq.

Biroq doktor Inderbir Gill ta’kidlaganidek, ichak to‘qimasi tabiatan bakteriyalarga boy bo‘lgani sababli, steril peshob tizimiga mos kelmaydi va turli asoratlarga olib keladi. Ular qatoriga elektrolit muvozanatining buzilishi, buyrak faoliyatining pasayishi va hazmdagi muammolar kiradi.

Zamin.uz tahririyatidan:
Janubiy Kaliforniyadagi ushbu operatsiya nafaqat tibbiyot sohasi uchun muhim qadam, balki butun dunyodagi shunga o‘xshash kasalliklar bilan og‘rigan bemorlar uchun ham katta umid manbai hisoblanadi. Ilmiy taraqqiyot inson hayotini o‘zgartirishda davom etmoqda. “Zamin”ni Telegramʻda oʻqing!