Mirziyoyev Vengriyaga tashrifini yakunlab, Sloveniyaga jo‘nab ketdi

O‘zbekiston Respublikasi Prezidenti Shavkat Mirziyoyevning Vengriyaga rasmiy tashrifi 20 may kuni yakunlandi. Safar doirasida davlat rahbari bir qator muhim uchrashuv va muzokaralarni amalga oshirdi.

Prezident Toshkent vaqti bilan 20 may kuni Vengriya Bosh vaziri Viktor Orban bilan ikki bosqichda — avval tor doirada, keyin kengaytirilgan formatda muzokaralar o‘tkazdi. Tomonlar siyosiy, iqtisodiy, ta’lim va texnologiya sohalaridagi hamkorlik istiqbollarini muhokama qilishdi.

Shu kuni Mirziyoyev Vengriya Milliy majlisi spikeri Laslo Kyover, shuningdek, mamlakatning yetakchi bank va yirik kompaniyalar rahbarlari bilan ham uchrashdi. Suhbatlarda investitsiyaviy loyihalar, qo‘shma korxonalar va ikki tomonlama savdo aylanmasini oshirishga oid masalalar muhokama qilindi.

Bundan tashqari, Prezident Shavkat Mirziyoyev Budapeshtda bo‘lib o‘tgan Turkiy davlatlar tashkilotining norasmiy sammitida ishtirok etdi. Tadbirda u tashkilot doirasidagi ko‘p qirrali hamkorlikni yanada kengaytirish va o‘zaro integratsiyani chuqurlashtirishga qaratilgan bir qator tashabbuslarni ilgari surdi.

Rasmiy tashrif yakunida Prezident Mirziyoyev Vengriya rasmiylari kuzatuvida Ferens List nomidagi xalqaro aeroport orqali Sloveniyaga jo‘nab ketdi. Eslatib o‘tamiz, u yerda ham O‘zbekiston yetakchisining qator rasmiy uchrashuvlari rejalashtirilgan.

Zamin.uz tahririyati mazkur rasmiy tashrifning siyosiy va iqtisodiy natijalarini yoritishda davom etadi. “Zamin”ni Telegramʻda oʻqing!