Finlyandiya va Shvetsiya Isroilga qarshi sanksiyalarda birlashmoqda!

Finlyandiya hukumati Shvetsiyaning Isroil vazirlariga Yevropa Ittifoqi darajasida sanksiyalar joriy qilish taklifini qo‘llab-quvvatlashini rasman e’lon qildi. Bu haqda mamlakat tashqi ishlar vaziri Elina Valtonenning bayonotiga asoslanib, RIA Novosti xabar tarqatdi.

Vazirning so‘zlariga ko‘ra, Xelsinki Isroil hukumatining ayrim vakillariga nisbatan YEI darajasida cheklovlar qo‘yish bo‘yicha Stokgolm tashabbusini qo‘llab-quvvatlaydi. Uning fikricha, ushbu choralar Isroil tomonidan falastinliklarning huquqlari muntazam buzilishiga qarshi javob bo‘lishi kerak.

Bu bilan birga, bundan avval Buyuk Britaniya ham Isroil Vazirlar Mahkamasi a’zolariga nisbatan sanksiyalar joriy etish masalasini ko‘targan edi. London hukumati Isroilning yetti nafar amaldori va yana yetti yuridik shaxsiga qarshi cheklov choralari kiritilganini rasman tasdiqlagan.

So‘nggi oylarda G‘arbiy Yevropa mamlakatlari orasida ham Isroil siyosatiga nisbatan tanqidiy kayfiyatlar kuchaymoqda. Ayniqsa, Ispaniya parlamenti Isroilga qurol-yarog‘ sotilishini taqiqlash bo‘yicha qarorni qabul qilib, xalqaro hamjamiyatda katta rezonansga sabab bo‘ldi.

Yevropaning an’anaviy ittifoqchilari bo‘lgan davlatlarning Isroilga qarshi bu kabi pozitsiyasining keskinlashishi, xalqaro maydonda yangi diplomatik nizolar kelib chiqishiga sabab bo‘lishi mumkin.

Mutaxassislarning ta’kidlashicha, G‘arbiy davlatlarning ushbu harakatlari Isroil va Falastin o‘rtasidagi mojaroning tinch yo‘l bilan hal qilinishi uchun xalqaro bosimni kuchaytirishga qaratilgan bo‘lishi mumkin.

Zamin.uz tahririyati mazkur xalqaro voqealar rivojini kuzatib, yangiliklarni muntazam yetkazib boradi. Siz bu sanksiyalar va cheklovlarning Isroilga nisbatan samarali bo‘lishi mumkin deb o‘ylaysizmi? “Zamin”ni Telegramʻda oʻqing!